Миржалол Қосимов: "Байрамга ғалабалар билан ўз хиссамизни қўшмоқчимиз"

Кеча асосий тантана ўтказилган бўлса, бугун шаҳар ва қишлоқларимизда байрам шукуҳи давом эттирилади. Биз эса, кун давомида таниқли футболчиларимиз, мураббийларнинг байрам табрикларини эътиборингизга ҳавола этиб борамиз. Байрам муборак бўлсин, азиз юртдошлар!

Миржалол Қосимов, Ўзбекистон миллий терма жамоаси бош мураббийи: - Менга берилган имкониятдан фойдаланиб, ҳамюртларимизни, футбол ишқибозларини энг улуғ ва азиз байрам  Мустақиллигимизнинг 23 йиллиги билан чин қалбимдан муборакбод этаман. Истиқлол бизга жуда кўп неъматларни берди. Бунга шукрона келтиришимиз керак.

Биринчи навбатда ўзлигимизни англадик. Очиғи, бугунги ёшларга ҳавас қиламан. Спорт, хусусан футбол соҳасида оладиган бўлсак, ёшлар учун барча шароитлар яратилган. Бунинг қадрига етиш керак.

Умид қиламанки, 4 ва 8 сентябрь кунлари ўтказиладиган ўйинларда ажойиб ғалабамиз билан бу байрамга ўз хиссамизни қўшамиз. Иордания ва Янги Зеландия терма жамоаларига қарши ўтказиладиган учрашувларда мухлислар учун ажойиб футбол оқшомини туҳфа этамиз. Ҳозирда бор эътиборни шу икки ўйинга қаратганмиз. Шу учрашувлар орқали Осиё ўйинларига тайёргарликнинг асосий ва ҳал қилувчи қисмини якунлаймиз. 2 сентябрь куни йиғинга таклиф этилган барча легионерлар терма жамоа ихтиёрига етиб келади. Ҳозирча ўзимизнинг маҳаллий футболчилар билан машғулот ўтказиб турамиз.  

Камолиддин АЛИМОВ ёзиб олди