Миржалол Қосимов: "Шубҳасиз, чемпионатнинг якуни қизиқарли бўлади"

"Ўйин қизиқарли бўлди. Мухлисларимизни хурсанд қилиш учун ҳам ғалаба қозонмоқчи эдик. Охирги вақтларда бизга панд бераётган жиҳат, вазиятлардан унумли фойдалана олмаслик туфайли очко йўқотдик. Биринчи бўлимнинг ўзида 5-6 та яққол вазиятларимиз бор эди ва ўйинни ҳал қилишимиз мумкин эди. Шу нарса бизни қийин вазиятда қолдирди. Нима ҳам деймиз, бунинг устида ишлаймиз, бу футбол.

Агарда майдонда ўйин кўрсатмай дуранг ўйнаганимизда бошимизни деворга урсак бўларди. Ҳаёт давом этади. Албатта, ўйинни қайта кўриб чиқамиз, янада кўпроқ ишлаймиз. 

Ўз ўрнида, "Олимпик" жамоаси ҳам яхши ҳаракатланганини таъкидлаш лозим.

Шубҳасиз, чемпионатнинг якуни қизиқарли бўлади. 

Албатта, иккинчи ўрин учун ҳали имконият бор. Бироқ айтиб ўтганимдек, яратаётган вазиятларимиздан фойдаланиш даражаси жуда паст. Менимча, биз ҳам шундоқ иккинчи ўринга чиқиб қолмаганмиз ёки мусобақани 40 очко билан бошламаганмиз-ку. Шунинг учун ҳам, аввало, мухлислар учун ўйнашда давом этамиз. Чиройли ўйин кўрсатишга ҳаракат қиламиз. Бугунги баҳс учун улардан узр сўраймиз. Футболда дуранг ва мағлубият доимо ёнма-ён юради. Ишонаман, ғалабалар келади", - деди Миржалол Қосимов.