Миржалол Қосимов: "Башорат қилишни ёқтирмайман"

Ўйин ҳақида

- Нима ҳам дейиш мумкин, яхши ўйин бўлди. Ярим финалда бир-бирига мос икки кучли рақиб тўқнаш келди. Томошабинлар жанговор руҳдаги қарама-қаршилик гувоҳига айланишди. Футболда гол урмасанг, ютмайсан.

Ўйинни яхши бошлагандик, биринчи бўлимга ҳакам томонидан қўшиб берилган дақиқаларда хатога йўл қўйдик. Финалга чиқиб шу орқали ОЧЛга йўлланмани қўлга киритишни мақсад қилгандик. Бугунги ўйинда мезбонларнинг ғалабасини 2 нафар ҳимоячи ҳал қилиб кетди. Албатта, стандартлар борасида кўрсатма бергандик. Ҳар бир футболчига бириктирилганлар бор эди. Аммо, озгина эътиборсизлик сабаб гол ўтказиб юбордик. "Насаф"ни финал йўлланмаси билан табриклаймиз, кейинги ўйинларда омад.

- "Насаф" билан кетма-кет икки бор кубок ярим финалида тўқнаш келаяпсизлар. Жамоани қай даражада ўрганган эдингиз ва қайси чизиқлар панд берди?

- Бу борада айтдим, стандарт вазиятлардаги эътиборсизлик туфайли гол ўтказиб юбордик. Ўтган ўйинда "Қизилқум" ҳам айнан стандарт вазиятда йўл қўйган хатомиздан фойдаланиб кетганди. "Насаф"да Алиқулов, Эшмуродов каби футболчилар бундай вазиятларда жуда яхши ишлашади.

- Сизнингча, эртанги ўйинда ким финалга чиқади?

- Бу мен энг ёмон кўрган савол. Башорат қилишни ёқтирмайман. Сиз ёки менинг айтганим бўлганида ҳозир финалга чиққан бўлардик.