“Милан” посбони фаолиятини “Астон Вилла”да давом эттиради

Бермингем клуби дарвозабонни мавсум охирига қадар ижарага олди. “Астон Вилла” сафида испаниялик футболчи жароҳат олган Том Хитоннинг ўрнини эгаллайди.

37 ёшли Рейна жорий мавсумда Италия чемпионатида битта учрашувда майдонга тушиб, ўз дарвозасидан битта гол ўтказиб юборган. Футболчининг миланликлар билан шартномаси 2020 йилнинг ёзига қадар мўлжалланган. Илгари у “Барселона”, “Вильярреал”, “Ливерпуль”, “Наполи”, “Бавария” клублари шарафини ҳимоя қилган. 

Испания термаси сафида Рейна 38 та учрашувда майдонга тушган. У фаолияти давомида Германия чемпионлиги, Англия ва Италия кубогини қўлга киритган. Терма жамоаси билан икки карра Европа чемпионлигига сазовор бўлган.