“Металлург”: Тўпураримиз “Пахтакор”га қарши ўйинда ёрдам беролмайди

Бу ушбу жамоаларнинг чемпионатларимиз доирасидаги 38-учрашуви бўлади.

Ортда қолган 37 ўйиннинг 30 таси пойтахтликларнинг ғалабаси билан якунланган. Фақатгина 3 та ўйинда бекободликлар зафар қучишган. 4 та учрашувда эса кучлар тенг келган.

Бу йилги мавсумнинг биринчи даврасида жамоаларнинг Тошкентда ўтказилган ўйинида пахтакорчилар 2:1 ҳисобида ғалаба қозонишди. Учрашувнинг 52-дақиқасида Игорь Сергеев ҳисобни очган бўлса, орадан йигирма дақиқа ўтиб Зоҳид Абдуллаев ҳисобни тенглаштирганди. Бироқ ўйин якунига етишига ўн дақиқа қолганда Шерзод Каримовнинг чиройли зарбасидан сўнг “Пахтакор” муҳим 3 очколи бўлганди. Бу гол пахтакорчиларнинг “Металлург” дарвозасига киритган 100-голи бўлганди. Бўлғуси учрашувларда бекободликлар томонидан киритиладиган биринчи гол “Металлург”нинг “Пахтакор” дарвозасига урган 30-голи бўлади.

Бекободдаги учрашувда “Металлург”га жамоа тўпурари Зоҳид Абдуллаев ёрдам беролмайди. Унинг ўтган турда “Обод”га қарши кечган ўйинда “ишлаган” сариқ карточкаси мавсумдаги тўртинчи огоҳлантириши бўлди ва З.Абдуллаев чемпионат Регламентига биноан навбатдаги турни ўтказиб юборишга мажбур.   

 
«Металлург» (Бекобод) – «Пахтакор» (Тошкент)
Ҳакамлар: Ш. Қосимов (Тошкент), Ф. Ёрмуҳаммедов (Тошкент), Б. Баҳромов (Тошкент), Н. Қосимов (Қарши).
Назоратчи: А. Попов (Тошкент).
ЎзПФЛ вакили: В. Леткин.