“Металлург” таркибидаги янгилар “тасдиқдан” ўтди

Унга кўра иккинчи даврадан эътиборан бекободликлар таркибида олти нафар янги ўйинчи тўп сурадиган бўлди. Янги ўйинчилардан икки нафари бекободликлар учун бегона эмас. Ҳужумчи Зоҳид Абдуллаев (фотода) узоқ йиллар “Металлург” шарафини ҳимоя этган, жамоанинг тўпурар ҳужумчиларидан бири бўлган. Шунингдек, иқтидорли ярим ҳимоячи Жавлон Мирабдуллаев ҳам бекобод футболи тарбияланувчиси. Аввалига “Андижон”да, кейин “Бунёдкор”да ўйнаган Жавлон Мирабдуллаев 2014 йилги мавсумнинг иккинчи ярмини “Металлург” таркибида ўтказади.

Зоҳид Абдуллаевдан ташқари Фарғонанинг “Нефтчи” жамоасидан бекободликлар сафига ярим ҳимоячи Маъруф Муродов ҳам келиб қўшилди. Вилоят биринчилигида ўйнаган Азизхон Ибрагимов ҳам “Металлург”нинг асосий таркиб ўйинчиларидан бирига айланиш учун ҳаракат қилади. Таркиб яна икки нафар ёш ўйинчилар билан бойиди. Суннат Эрматов Тошкент темирйўлчилари таркибидан “Металлург”га келиб қўшилган бўлса, Дониёр Жўраев клубнинг болалар ва ўсмирлар олимпия заҳиралари спорт мактаби тарбияланувчисидир.

Ўз навбатида “Металлург” 6 нафар ўйинчи билан хайрлашди. Булар Сардорбек Соибов, Мурод Тўйчибоев, Константин Петров, Бенуми Абдунабиев, Мансурбек Махсудов ва Равшанбек Ягудин.
 
Қуйида “Металлург” таркибига келиб қўшилган янги футболчилар ҳақида батафсил маълумот берилмоқда:

Исми шарифи	Туғилган йили	Амплуаси	Рақами	Қайси жамоадан
Зоҳид Абдуллаев	25.05.1984	Ҳужумчи	55	“Нефтчи”
Маъруф Муродов	11.03.1990	Ярим ҳимоячи	66	“Нефтчи”
Азизхон Ибрагимов	08.05.1986	Ярим ҳимоячи	46	“Нефтчи-Тинчлик”
Жавлон Мирабдуллаев	19.03.1994	Ҳимоячи	88	“Бунёдкор”
Суннат Эрматов	17.06.1995	Ярим ҳимоячи	47	“Локомотив”
Дониёр Жўраев	09.08.1997	Ҳимоячи	48	“Металлург” БЎОЗСМ