“Металлург” Ирматов келганини тасдиқлади

Куннинг биринчи ярмида бекободликлар “Бунёдкор” футбол академияси майдонида шуғулланишаётган бўлишса, куннинг иккинчи ярмида машғулотлар “Пахтакор” БЎСМ мактабига қарашли майдонда ўтказилмоқда.

Бу ҳафта мураббийлар штаби ихтиёрида 30 нафардан зиёд футболчилар кўрикдан ўтишяпти. Янги келган ўйинчилар орасида футбол ишқибозларига Фарғонанинг “Нефтчи” жамоасидаги фаолияти орқали яхши таниш бўлган Дилёрбек Ирматов ҳам бор.

Шунингдек, машғулотларда “Металлург” футбол клубининг ўтган йилги ёшлар таркибидан келган ўйинчилардан ташқари “Пахтакор”, “Бунёдкор” сингари футбол клублари ўринбосарлари ҳам кўрикдан ўтишмоқда.

Бугун футболчилар икки таркибга бўлинган ҳолда кичик назорат учрашувини ўтказишди. Унда Зоҳид Абдуллаев етакчилигидаги асосий таркиб аъзолари сардор томонидан урилган икки гол эвазига ғалаба қозонишди.

Машғулотлар якунлангач бир қатор футболчиларга жавоб берилди. Шанба куни ушбу ҳафта якунлари “Бунёдкор” ёшлар жамоасига қарши назорат учрашуви билан интиҳо топади. Бу назорат ўйинидан кейин кўрикда турган яна бир қатор футболчиларнинг тақдирига ойдинлик киритилади.

"Нефтчи"ни яна бир футболчи тарк этди. Дилёрбек Ирматов “Металлург”да