"Манчестер Юнайтед" Марсьяль борасида ҳеч қандай сўров олмаган. Клуб харидор топилишига шубҳа қилмоқда

Инглиз клуби ҳали футболчи борасида жиддий сўровларни олмаган.

Бир ҳафта олдин футболчининг агенти Филиппе Ламболи Марсьяль қишда "Юнайтед"ни тарк этишни истаётганини айтганди. Бироқ бу баёнот ҳам французга бўлган қизиқишнинг ортишига сабаб бўлмади.

"Манчестер Юнайтед" Антонининг трансфери учун керакли суммани тўлашга қодир, шунингдек, футболчига Манчестердагидек юқори маош тўлашга тайёр клуб топилишига шубҳа қилмоқда.

МЮ ҳужумчини трансфер қилиш бўйича таклифларни кўриб чиқишга тайёр, чунки мураббий Ральф Рангник фақат клубдаги мавқеидан мамнун бўлганлар билан ишлашни хоҳлашини айтди.

Шу билан бирга, "Манчестер Юнайтед" футболчини сотиш учун унинг нархни пасайтирмоқчи эмас. Бундан ташқари, агар у ижара асосида бошқа жамоага кетса, клуб унга маошнинг катта қисмини тўлашга тайёр эмас.

Марсьялнинг "қизил иблислар" билан амалдаги шартномаси 2024 йилда тугайди ва яна бир йилга узайтириш имкониятини ўз ичига олади.

26 ёшли ҳужумчи "Манчестер Юнайтед" таркибида АПЛ доирасида бор-йўғи икки марта асосий таркибда, яна бешта учрашувда захирадан майдонга тушди. Бундан ташқари, Марсьяль Чемпионлар лигасида икки ўйинда иштирок этди.