"Манчестер Юнайтед" дарвозасини 2 сония қўриқлаган посбоннинг ноёб карьераси

Англиядан ноёб воқеа

1999 йил 22 августда Премьер-лиганинг 4-тур доирасида "Манчестер Юнайтед" "Хайбери"да "Арсенал" билан ўйнади. Биринчи бўлим охирида мезбонлар олдинга чиқиб олишди. Бергкампнинг узатмасидан сўнг Юнгберг гол урди. Аммо иккинчи бўлимда меҳмонлар ўйин тизгинини ўзгартира олишди.

Лондон клуби сўнгги сонияларда ҳисобни тенглаштириш имкониятига эга бўлди. Стандарт вазият, қанотдан узатма, Метю Апсоннинг бош билан берган зарбаси ва тўп Раймонд ван дер Гоувнинг қўлида. Бироқ, "Арсенал" ҳимоячиси дарвозабоннинг қўлидаги тўпга зарба берди ва меҳмонлар посбони тўпни қўли билан бирга дарвозага олиб кирди. Табиийки, учрашувни бошқараётган ҳакам Грем Пол голни ҳисобга олмади ва қоидабузарликни қайд этди. 

Ушбу вазиятда ван дер Гоув бошидан жароҳат олди. Нидерландиялик посбонни замбилда олиб чиқиб кетишди.

Ҳакамнинг учрашув якунига етганини билдирувчи сўнгги ҳуштаги чалинганича йўқ, шунинг учун меҳмонлар дарвозабонни алмаштириши керак эди. "Манчестер Юнайтед"нинг захира ўриндиғида ким бор? Марк Боснич жароҳати туфайли қайдномага киритилмаган эди, шу сабабли фақат учинчи дарвозабон 21 ёшли Ник Калкин захирада ўтирибди.

Калкин майдонга югуриб тушди, тўпни тепди ва бош ҳакам Пол ҳуштак чалиб ўйинни якунлади. Ник майдонда фақат 2 сония ҳаракат қилди. Бу унинг Премьер-лигадаги дебюти эди, аммо у  шундан сўнг бошқа у ерда кўриниш бермади.

Калкин 1997-2002 йилларда Манчестер клуби аъзоси ҳисобланган, лекин бу вақт давомида у ижара асосида "Халл Cити", "Бристол Роверс", "Ливингстон" каби клубларда ижарага берилди. Кейин эса эркин агент сифатида "Куинз Парк Рейнжерс"га кўчиб ўтди. Лондон жамоасида икки мавсум ўтказди (22 ўйин) ва жароҳат туфайли 26 ёшида футболчилик фаолиятини якунлади. Ник шундан сўнг боғдорчилик билан шуғулланган, дарвозабонларга мураббийлик қилган, шунингдек, вақти-вақти билан ишқибозлар учун ўйнаган.

Аммо бу билан унинг футбол ҳақидаги ҳикояси тугамади. 2005 йилда "Манчестер Юнайтед" мухлислари америкалик Глейзерлар оисласининг севимли клублари эгасига айланишидан норози бўлиб, ўнинчи дивизионда ўз жамоалари — "Юнайтед оф Манчестер"ни ташкил қилишди.

2014 йилда Калкин еттинчи лигага чиққан "Юнайтед оф Манчестер"га таклиф қилинди. Ник 3та ўйинда дарвозани ҳимоя қилди ва "Манчестер Юнайтед" ҳамда "Юнайтед оф Манчестер" жамоалари учун ўйнаган биринчи футболчига айланди.  

Мана, ноёб карьера!

Хуршида Абдикулова таржимаси