Маъмур Икромов: “ОЧЛдаги дебют мавсумим мен учун катта тажриба бўлди”

 33 ёшли дарвозабон “темирйўлчилар”нинг гуруҳдан чиқиш имкониятини юқори баҳолаётганини алоҳида таъкидлаб ўтди. 

- Осиё чемпионлар лигаси учун қуръа ташлаш маросимини диққат билан кузатиб бордим. Чунки жамоамиз ўрин олган олган гуруҳга қайси рақибларнинг тушиши қизиқ эди. Ўйлайманки қуръа биз учун қулай келди. Билсангиз бу йил кучли жамоалар билан битта гуруҳдан ўрин олгандик. Лекин келаси йилги рақибларни у қадар кучсиз деб бўлмайди. Бежизга улар ҳам ўз чемпионатларида юқори ўринларни эгалламаган. Буни бўлажак учрашувларда ҳар бир клуб исботлашга уриниши турган гап. Рақибларимиз билан танишиб чиқдим. Менимча “А” гуруҳидан “Локомотив”нинг кейинги босқичга чиқиш имконияти юқори. Тўғри бу осонликча амалга ошмайди. Лекин харакат қилиб уддаласа бўлади. Эроннинг “Сепахон” клубини гуруҳдаги фаворитлардан бири дейиш мумкин. Бу жамоада ҳамюртимиз Фозил Мусаев ўйнамоқда. Қизиқарли ўйин бўлса керак уларга қарши. Албатта ҳар бир ўйинга жиддий қараб, уларни синчковлик билан кузатиб борамиз. Энг асосий мақсад – аввало гуруҳдан кейинги босқичга чиқиш бўлади. 

- Бу йил “Локомотив” сафида Осиё чемпионлар лигасида дебют мавсумимни ўтказдим. Бунгача жамоаларимиз иштирокидаги ўйинлар орқали ушбу мусобақани кузатиб борардим. Футбодаги асосий мақсадларимдан бири ҳам – ОЧЛ ўйинларида иштирок этиш эди. Яратган шукур, жорий мавсум бунга эришдим. Осиёнинг таниқли ва шу билан бирга кучли клубларига қарши ўйнадим. Бу мен учун катта тажриба бўлди. Маҳоратимни янада оширдим. Насиб қилса келаси йил ҳам бунданда яхшироқ ўйин кўрсатишга интиламан. 

- “Локомотив”да ўтказган бу йилги мавсумимдан кўнглим тўлди дея оламан. Чемпионат учрашувларида жами 13та ўйин ўтказдим. Менимча бу нормал холат. Ўзингизга яхши маълум, жамоада мендан ташқари Игнатий Нестеров ҳам бор. Ўзбекистондаги биринчи рақамли посбони деб биламан уни. Албатта Нестеровдек тажрибали посбон билан машғулот ўтказиш билан бирга, чемпионатда 13та ўйин ўтказиш ўзим учун ижобий натижа деб баҳолайман - дейди Маъмур Икромов.

Исломбек Рустамбеков.