Максим Шацких: "Рақибни ўрганиб чиқдик. Фикримча, "Ал Ҳалдия" Қатар клубидан кучлироқ"

Анжуманда мезбонлардан бош мураббий Максим Шацких ва ҳимоячи Шаҳзод Азмиддинов иштирок этди.  

"Ҳаммага хайрли кеч. Учрашувга ёмон тайёрланмаганимизга ишончим комил. Рақибни ўрганиб чиқдик. Фикримча, бу Баҳрайн клуби Қатар клубидан кучлироқ. "Ал Ҳалдия" майдонда ишончли ўйин кўрсатади, тезкор ва жисмоний жиҳатдан кучли, футболчилари узун ва бақувват. Эртанги баҳсга шундан келиб чиқиб тайёрландик. Бизни қизиқарли учрашув кутмоқда. Умид қиламанки, ў зимиз кўзлаган натижага эришамиз.

Эртага мухлисларни "Бобур Арена"да кутамиз. Бу бизга ишонч ва куч бағишлайди", – деди Шацких.

"Жамоамизда кайфият аъло. Гуруҳдаги энг қийин ўйинларимиздан бири бўлади. Астойдил ҳаракат қилиб, "Бобур Арена"да 3 очкони қўлга киритамиз. "Ал Ҳалдия"нинг кучли ва кучсиз жиҳатларини ўрганиб чиқдик. Мухлисларни стадионда кутиб қоламиз. Худо хоҳласа, 3 очко "Бобур Арена"да қолади деган умиддаман", – деди Азмиддинов.

- Охирги ўйинларда ҳимояда муаммолар борлиги кўринмоқда. Жамоа "Шўртан" билан ўйинда ҳам бир қатор голларни ўтказиб юборди. Қисқа давр ичида бу муаммо устида ишладингизми?

- Албатта, ҳимоя устида ҳар куни ишлаймиз. "Шўртан" билан ўйинда тактик эмас, техник хатоларга йўл қўйилди. Барчамиз инсонмиз ва барчамиз хато қиламиз. Бу нормал жараён. Машғулот жараёнида ҳимояга кўп урғу қаратамиз. Умид қиламанки, эртанги учрашувда хато қилмаймиз.

- Исмоил Акинаденинг ҳолати қанақа? Эртанги учрашувда қатнаша оладими?

- У умумий гуруҳда шуғулланмоқда. Умид қиламанки, эртанги баҳсда қатнашади. У бошланғич таркибда бўлади ёки захирадан тушади. Ҳозир аниғини айтолмайман.

- Азмиддиновга савол. Бундан олдинги турда "Ал Ҳалдия" ғалаба қозониб, гуруҳ пешқадами бўлиб олганди. Сизнингча, Баҳрайн жамоаси таркибидаги қайси футболчи хавфли кўринмоқда?

- Ўйинларини кўриб чиқдик. Бақувват футболчилари талайгина. Олдинги чизиқда ҳаракат қиладиган 99-рақамли футболчисининг бўйи узун ва тез экан. Уни тўхтатишга ҳаракат қиламиз. Бундан ташқари, чап оёқда ўйнайдиган 19-рақамли футболчиси яхши паслар бериб туришига гувоҳ бўлдик.

Футболчиларимиз ҳам руҳан, ҳам жисмонан бу беллашувга тайёр. Худо хоҳласа, 3 очкога эга чиқишга уринамиз.

Эслатиб ўтамиз, "Андижон" – "Ал Ҳалдия" беллашуви эртага "Бобур Арена"да ўтказилади. Учрашув 18:45 га белгиланган.