“Локомотив” – “Насаф” олдидан. Камолиддин Алимов: "Бугун дуранг бўлса керак"

"Орадан роппа-роса икки йил ўтиб бу икки жамоа яна миллий чемпионатимизнинг 2-турида, боз устига Тошкентда тўқнаш келишяпти. Икки йил аввал "Локомотив" ўз майдонида "Насаф"га 0:1 ҳисобида имкониятни бой бериб қўйганди. Носир Отақўзиев томонидан киритилган ягона гол қаршиликларга муҳим уч очкони тақдим этган эди. Аммо ҳозир вазият ўзгарган.

Бугунги "Локо"ни икки йил аввалгиси билан таққослаб бўлмайди. Айниқса, бу йил жамоа раҳбарияти таркибга Игнатий Нестеров, Жасур Ҳасанов, Лутфулла Тўраев сингари тажрибали футболчиларни қўшиб олди. "Темирйўлчилар" бир ўқ билан икки қуённи уришди. Ўзлари кучайишди, асосий рақибни эса заифлаштиришди. Ўз ўрнида "Бунёдкор" ҳам худди шундай усулни "Пахтакор"га нисбатан қўллаган эди. "Локомотив" бош мураббийлигига Вадим Абрамовнинг тайинланиши ҳам Тошкент клуби фойдасига ишлайди.

Клуб раҳбарияти томонидан трансферларга жуда катта маблағ сарфланди. Бу пулларни оқлаш футболчи ва мураббийларга қолди. Энди "Насаф"га келсак, Рўзиқул Бердиев жамоаси ҳам бу йил ўз олдига юксак мақсадларни қўйиши тайин. Маблағ жиҳатдан Қарши жамоаси "Насаф"дан асло қолишмайди. Лекин чемпионлик унвони битта. Қолаверса, таркибини тўлалигича сақлаб қолган "Пахтакор" ҳам бу йил ўз сўзини айта бошлади.

Шахсий фикрим, бугунги "Локомотив" - "Насаф" ўйинида дуранг натижа қайд этилади. Икки кун ёққан ёмғир майдоннинг сифатига таъсир ўтказмаган. Ҳозир ёмғир тинган ва айни футбол ўйнайдиган об-ҳаво. Агар майдон эгалари бугун тезкор гол ура олишса, балки кичик ҳисобда ғалаба қозонишар. Кўрамиз, бу футбол... у айнан кутилмаган ҳолатлари билан ҳам қизиқ", - дейди Камолиддин Алимов.