"Локомотив" машғулотларига черногориялик ҳужумчи қўшилди

Черногориялик ҳужумчи Иван Вукович ҳозирча кўрикдан ўтмоқда. Унинг жамоада қолиш-қолмаслиги ҳали аниқ эмас.

Маълумот ўрнида шуни айтиб ўтишимиз мумкин, Иван Вукович 1987 йилда туғилган бўлиб, ҳужум чизиғида тўп тепади. Фаолияти давомида Хорватиянинг "Хайдук", Жанубий Кореянинг "Сеонгнам", Сербиянинг "ОФК Београд", Черногориянинг "Младост", шунингдек Исроилнинг "Маккаби Нетанья" клубларида тўп сурган. Бўйи 179 см. бўлган ҳужумчи ҳам ҳужум чизиғида, ҳам ҳужум ортида бирдек ўйнай олади.

Иван Вукович Европа Лигаси баҳсларида ҳам иштирок этган. Хусусан, у 2012 йил 9 августда бўлиб ўтган Европа лигаси учинчи саралаш босқичида Миланнинг "Интер" клубига қарши майдонга тушиб, жуда чиройли гол муаллифи бўлган. Ўшанда футболчи "Хайдук" сафида ўйнарди. Бундан ташқари, Вукович 2009 йилнинг 18 ноябрида Черногория миллий терма жамоасида ўз дебютини нишонлаган. Черногорияликлар Беларусь термасига қарши ўртоқлик учрашувида майдонга тушишганди.

Айтиб ўтганимиздек, бу ҳужумчи ҳозирча "Локо" машғулотларида иштирок этмоқда ва клуб билан шартнома имзолагудек бўлса, бу ҳақда дарҳол хабар қиламиз.