"Локомотив" кундалиги: Абу Дабидаги иккинчи кун. Таркибга яна бир янги футболчи қўшилди

Эрталабки машғулот тўлиқ майдонда кечган бўлса, кечки пайт футболчилар дастлаб тренажёр залида шуғулланишди, сўнгра яна майдонга чиқилди. Бугун жамоа таркибига яна бир янги футболчи келиб қўшилди. Россиялик таниқли ҳужумчи Павел Погребнякнинг кенжа укаси Кирилл Погребняк "темирйўлчилар" билан шартнома имзолаб, жамоамиз машғулотида иштирок этди. 

Маълумот учун, Кирилл Погребняк ҳам акаси Павел каби ҳужум чизиғида тўп тепади. "Локо" машғулотларида асосий эътибор ҳозирча жисмоний юкламалар, шунингдек тўп билан ишлашга қаратилмоқда. Маълумки, қишки йиғинда футболчиларнинг жисмоний ҳолатини бир маромга келтириш муҳим ҳисобланади. 

Машғулотларда барча тер тўкиб меҳнат қилмоқда. Ўз навбатида мураббийлар ҳам жамоани янги мавсумга жиддий тайёрлаш учун машғулотнинг турли усулларини футболчиларга ўргатишяпти. 

Эслатиб ўтамиз, янги мавсум "Локо" учун 21 январдан бошланади. Шу куни "темирйўлчилар" ўз уйларида Осиё чемпионлар лигаси плей-офф босқичи доирасида Тожикистоннинг "Истиқлол" клубини қабул қилишади.