"Локомотив": Бу ҳали бошланиши

Бугун клуб ўз таркибини Йован Жокич, Филипп Райевац ва Азизбек Ҳайдаров билан кучайтириб олди. Шунингдек, янги мавсум стартига қадар яна бир неча юқори савияли футболчилар "темирйўлчилар" аъзосига айланади. Улар ҳам "Локомотив" шарафини муносиб ҳимоя қилишади. Бу шунчаки бошланиши.

"Локо" кейинги мавсумни юқори савияда ўтказиш учун 8-23 январь кунлари БААда йиғин ташкил қилади. Эктор Купер бошчилигидаги Ўзбекистон термасига чақирилган "Локомотив" футболчилари ушбу йиғинда қатнашмайди. Қолган барча футболчилар бир тан-у бир жон бўлиб, янги мавсум учун тайёрланишади.

Сўнгги йилларда "Локомотив" футбол клубида катта ўсиш кузатилди. "Локо" кетма-кет уч марта Ўзбекистон чемпионлигини, 2 марта Ўзбекистон кубогини қўлга киритди. Буларнинг барчаси жамоага эътибор яхши эканлигидан, барча ўз ишига сидқидилдан ёндашаётганидан далолат беради. Шу боисдан айта оламизки, янги мавсумда ҳам "темирйўлчилар"нинг Осиё Чемпионлар лигасида юртимиз шаънини муносиб ҳимоя қилиш, Ўзбекистон Чемпионлигини яна бир бора қўлга киритиш ва Ўзбекистон кубогига эга чиқиш каби мақсадлари ўзгармайди.

Ҳозир клубдаги барча инсон бир йўлда бирлашган ва юқори мақсадлар учун иш олиб боришмоқда.

Турли хил сайтларда жамоамиз ҳақида янграётган янгиликларга ишонмасликни сўраб қоламиз. Чунки клуб раҳбарияти ҳар доим футболчилар, мураббийларни қўллаб-қувватлашда давом этади.