Легионерлар. Бугун Йўлдошев, Ҳусанов, Ашурматов, Раҳмоналиев жамоалари ўйнайди, Эронда "ўзбек дербиси" бор

Беларусь

Ҳужумчи Шаҳзод Убайдуллаевнинг "Шахтёр" Солигорск жамоаси Беларусь Олий лигаси 4-турида "Гомел"ни меҳмон қилади. 4- ва 11-ўрин эгалари ўртасидаги учрашув Тошкент вақти билан 18:00 да бошланади.

Шунингдек, мазкур чемпионатда тўп тепадиган яна бир легионеримиз – Ўзбекистон U-20 термаси ҳимоячиси Абдуқодир Ҳусанов ва ярим ҳимоячи Амирбек Бакаевнинг "Энергетик-БГУ" клуби сафарда "Неман" билан баҳс юритади. Ўйин 22:00 да бошланиши режалаштирилган.  

Россия

Қанот ҳимоячиси Иброҳимҳалил Йўлдошевнинг "Нижний Новгород" жамоаси 23-тур доирасида Москвада "Динамо" билан баҳс юритади. 13-ўринда бораётган "Нижний Новгород"нинг ўйини 16:00 га белгиланган. 

Шунингдек, РПЛ доирасидаги яна бир баҳсда ярим ҳимоячи Ҳожимат Эркинов ўйнаётган "Торпедо" ўз уйида "Спартак" билан тўқнаш келади. Учрашув 21:00 да старт олади.

Бундан ташқари, МФЛда ҳам легионерларимиз иштирокида ўйинлар бор. Жумладан, ҳимоячи Рустам Ашурматов ва хавбек Умарали Раҳмоналиевнинг "Рубин" жамоаси 27-турда "Шинник" билан учрашади. Қозон клуби ўйини 18:00 да бошланади.

Бундан ташқари, Вагиз Галиулиннинг "Нефтехимик" клуби турнир аутсайдерларидан бири "Краснодар-2" билан баҳс олиб боради. Мазкур учрашув 19:30 да бошланиши кутилмоқда.

Эрон 

Эрон Про-лигаси 26-турида "ўзбек дербиси" бўлиб ўтади. Унда ҳужумчи Шерзод Темировнинг "Пайкон" жамоаси ўз уйида Шароф Муҳитдинов тўп тепадиган "Санат Нафт" жамоасини меҳмон қилади. 13- ва 15-ўринни эгаллаб турган клублар ўртасидаги беллашув 21:00 га белгиланган.