Конате "Реал"нинг асосий трансфер мақсадига айланди

Футболчининг "Ливерпуль" билан шартномаси 2026 йилнинг июнигача мўлжалланган, аммо янги келишув бўйича музокаралар ҳозирча натижа бергани йўқ.

Франция терма жамоаси футболчиси 1 январдан бошлаб Англиядан ташқаридаги клублар билан музокара олиб бориш ва дастлабки шартномаларни имзолаш ҳуқуқига эга бўлди, бу эса Мадрид клуби қизиқишини янада оширди.

Аввалроқ "Ливерпуль" сардори Виржил ван Дейк ҳимоядаги шеригига юқори баҳо бериб, Конате жамоада қолишидан умидвор эканини айтган. Нидерландиялик футболчига кўра, француз ҳам майдонда, ҳам майдондан ташқарида муҳим фигура ҳисобланади ва у уни жаҳон даражасидаги ҳимоячи деб билади.

Бош мураббий Арне Слот ҳам клуб футболчининг вакиллари билан музокараларни давом эттираётганини тасдиқлади. Шу билан бирга, мутахассис "Ливерпуль" Конатени сақлаб қолишни хоҳлашини айтди, бироқ музокаралар натижаси ҳали ҳам ноаниқлигича қолмоқда. 

"Bild" нашрининг ёзишича, айни пайтда Конате "Реал"нинг ҳимояни кучайтириш бўйича асосий мақсади ҳисобланади. Хабар қилинишича, футболчи ҳам Англиядан ташқаридаги фаолиятининг янги босқичи ҳақида ўйлаб қўйган.