Клаудио Писарро фаолиятини якунлаш ҳақида ўйлаётгани йўқ

"Тан оламан, 35 ёшда ҳамма ҳам футбол ўйнайвермайди. Кўпчилик футболчилар 30 ёшдаёқ бутсаларини михга илишади. Аммо мен бундай қилишга чоғланаётганим йўқ. Боиси жисмоний ҳолатим яна бир неча мавсум юқори даражада ўйнаш имконини беради. Шунинг учун "ўйиндан ташқари ҳолат"да бўлишни истамаяпман. Биламан, "Бавария"да рақобат кучли. Аммо бу мени умуман ҳавотирга солмаяпти. Чунки, "Бавария"да асосий таркибдан жой олмасам, менга кўпроқ ўйин амалиётини бера оладиган бошқа бирор клуб топилишига ишонаман", - деди перулик футболчи.

Айтиб ўтиш жоизки, Писарро жорий мавсумда Мюнхен супер-клубининг асосий таркибидан кўп ҳам жой олаётгани йўқ. Чунки унинг Марио Манджукич ва Томас Мюллер каби жамоадошлари ажойиб ўйин намойиш этишмоқда. Шу боисдан ҳам немис матбуотида Писарронинг "Бавария"ни тарк этиши борасида фикрлар янграй бошлади. Бунга Роберт Левандовскининг ёзда Мюнхенга кўчиб ўтиши ҳам маълум манода туртки бўлди.