Касбини яхши кўрмайдиган юлдузлар

2021 йил октябрь ойида "Арсенал"нинг 50 миллион фунт стерлингга сотиб олган ҳимоячиси Бен Уайт футбол кўришни унчалик ҳам ёқтирмаслиги ва Патрик Виейранинг ўйинларини ҳеч қачон кўрмаганини тан олганди. Шу сабабли, дунёдаги энг машҳур ўйинни томоша қилишни ёқтирмайдиган футболчиларни ёдга олишга қарор қилдик.

Одатда, қилаётган ишингдан завқ олсанг, ўзинг севган иш билан машғул бўлсанг, муваффақиятга эришасан дейишади. Аммо бу йигитлар бунинг акси бўлишини амалда исботлай олишган.

Гарет Бэйл

Бэйлга футбол ўйнаш ёқса ҳам, эндиликда у фақатгина Уэльс термасида тўп тепишни ёқтиради, шекилли. Шунингдек, Гарет гольф ҳаваскори экани ҳеч кимга сир эмас. Аммо форвард унга нафақат гольф ўйнаш, бакли уни томоша қилиш ҳам ёқишини айтган. Баъзилар қанчалар ҳам зерикарли машғулот дейишлари мумкин, фақат Бэйл эмас.

Карлос Тевес

Тевес "Бока Хуниорс"ни, "Бока Хуниорс" эса Тевесни жуда яхши кўради, лекин шу ерда аргентиналикнинг қизиқиши якунланади. Энди у нега "МЮ"дан "Манчестер Сити"га ўтгани маълум.

"Мен футболни ёқтирмайман. Агар бир каналда "Барселона" - "Реал" учрашуви, бошқа каналда гольф бўйича турнир бўлаётган бўлса, ҳеч иккиланмай, гольфни танлаган бўлардим".

Марк-Андре тер Штеген

Футбол германиялик посбонга йилига миллионлаб евро келтиради. Аммо у ҳаттоки, Испания чемпионати футболчиларини ҳам танимайди.

"Баъзида мендан қайсидир футболчи ҳақида сўрашади, мен эса у кимлигини ҳам билмайман. Очиғини айтсам, Примера ўйинчиларини юзидан танийман, аммо исм-фамилияси билан эслаб қололмайман".

Габриэль Батистута

"Фиорентина" ва Аргентина терма жамоаси афсонаси ҳеч қачон ўзининг исмини баралла куйлаётган тумонат мухлислар қаршисида тўп тепишни ишдан ортиқ бир нарса деб ҳисобламайди. Хўш, унда футболчи нима иш билан завқланиб шуғулланади? Поло.

Бу борада буюк форвардни тушуниш мумкин, чунки футбол туфайли оғир операцияни бошдан ўтказган.

"Таътил пайтлари Аргентинага қайтганимда, дўстларим поло ўйнашга таклиф қилишарди. Аввалига шунчаки қизиқ туюлганди, лекин кейин уни жуда ёқтириб қолганман. Бу — хобби, аммо мунтазам равишда даражамни кўтаришга ҳаракат қиламан".

Карлос Вела

Мексикалик футболчи Европадан шунчаки кўчиб кетгани йўқ. Лондон ёки Сан-Себастьянга қараганда, Лос-Анжелесдаги ҳаёт анча қизиқроқ. Ростини айтадиган бўлсак, Европадан кўра, Америка кўчаларида Велани камроқ инсон танийди.

"Яхши фильм ёки яхши футбол учрашувидан бирини танлаш лозим бўлса, очиғи, кино кўришни афзал деб биламан. Ҳеч қачон бирорта клубга мухлислик қилмаганман. Баҳс тугади ва у билан боғлиқ барча нарса мен учун ҳам ўша ерда якунига етади. Бўш вақтимда мен билан футбол ҳақида суҳбатлашишни ҳаёлингизга ҳам келтирманг!".

Нозима Зарипова таржимаси