Карпин: “Албатта, бизни Тожикистонга қарши ўйин учун танқид қилишади”

Россия терма жамоаси бош мураббийи Валерий Карпин Тожикистон билан ўртоқлик учрашувидаги дуранг (0:0) ҳақида фикр билдирди.

"Ўйин тенг ўтмади. Мутлақо. Натижа адолатли бўлиши мумкин. Футбол сифати? Биринчи бўлим менга ёқди, аммо иккинчи таймда назорат кам бўлди, ўйин майдон марказисиз давом этди. Айниқса, иккинчи таймнинг дастлабки 20 дақиқасида. Кейин яна ўйин назоратини қўлга олдик. Вазиятларни ижобий якунлаш учун нима етишмаётганини билмайман. Буни кўриб чиқамиз.

Бу ўйиндан кейин мухлислар бизни танқид қилишадими? Албатта, танқид қилишади! Шубҳасиз! Ютмадик-ку, ахир. Қирғизистон билан ўйинда бундан 10 марта ёмон ўйнагандик, аммо ғалаба қозонгандик. Бугун ғалабага эришмадик, демак, ҳаммаси ёмон. Сиз танқидга тайёрмисиз? Ҳар доим тайёрман", – деди Карпин.

Навбатдаги учрашувда Валерий Карпин шогирдлари Тошкентда Ўзбекистон билан куч синашади. Ўйин 20 ноябрь куни Тошкент вақти билан 17:00 да бошланади.