ЖЧ-1998 саралаши. Миржалол Қосимов: "БААга пенальтидан гол ура олмаган ўйинимда майдонга тушишга лойиқ эмасдим, телевизорга қарашга уялганман"

Ўшанда илк раунддан муваффақиятли ўтган вакилларимиз иккинчи босқичда муаммога дуч келган. Япония, Жанубия Кореяга сафарда енгилган, Қозоғистон билан дуранг ўйнаган терма жамоамиз Тошкентда БААни қабул қилган. Афсуски, ўйин амирликларнинг 3:2 ҳисобидаги ғалабаси билан якунланган. Ўша баҳсда пенальтини голга айлантира олмаган Миржалол Қосимов "Футбол тв" каналида "France-98" саралаши ҳақида тайёрланган кўрсатувда барчасини айтиб берди.

"Бир йилдан ошиқ вақт футбол ўйнамаганман, машғулот ҳам ўтмаганман. Операциядан сўнг сузиш, гимнастикага бориб муолажа қилардим, лекин жамоа билан машғулот бўлмаган, катта юклама олмаганман. Икки ҳафта югурмасангиз, йиғган жисмоний кучингизни йўқотасиз. Лекин бу ерда хоҳиш кучли бўлди. Шу нарса мураббийликда асқотди. Футболчи жисмонан тайёр бўлиши керак. Ҳозир жисмоний тайёргарлик кўп нарсани ҳал қиляпти.

Майдонга чиқдим, ёрдам бермоқчи бўлдим. Ўйиндан олдин шифокоримиз Анатолий Туриковдан дори сўраганим эсимда. Ҳаёлимда 45 дақиқа учиб юргандек бўлдим. Кейин 11 метрлик нуқтадан гол ура олмадим. Мускулларим нол, жисмоний ҳолатим ҳам шундай. Фақат хоҳиш бор эди, лекин у билан иш битмайди. Худди машина балонига ўхшарди.

Уйга келиб, ўйинни кўрганимда телевизорга қарашга уялдим. Мен учун жуда катта мактаб бўлди. Ўшандан кейин жисмонан тайёр ҳолатга келмагунимча майдонга чиқмасликни одат қилдим. БАА билан ўйинда тўп тепишга лойиқ эмасдим, майдонга чиқишим керак эмасди. Пенальти ура олмаганим — айбим. Асlида, йўқ деб туриб олишим лозим эди", — дейди Қосимов.