Жасур Абдураимов: "Пахтакор" осон гуруҳга тушмади"

Қуръа ҳақидаги фикрларни билиш мақсадида "Пахтакор" жамоасида Шота Арвеладзега яқиндан кўмаклашиб келаётган Жасур Абдураимовга юзландик. 

"Гуруҳимизда ёмон ва кучсиз рақиблар йўқ. "Бунёдкор" ва "Қўқон-1912"ни қандай кучга эгалигини барча яхши билади. Шунингдек, "Оқ-тепа" ҳам Про лигада ёмон иштирок этмаяпти. Бу жамоани ҳам яхши биламиз. "Пахтакор" осон гуруҳга тушгани йўқ. Ҳамма ўйинлар ўзига яраша қийин кечади. Ўзингиз яхши биласиз қўқонликлар бизга охирги йилларда жуда яхши ва муносиб қаршилик кўрсатишмоқда. Улар билан доим қийиналмоқдамиз. Ўтган мавсумда Лига кубогида ҳам, Суперлигада ҳам бизга етарлича муаммо туғдира олишди. Рақибимиз охиригача курашадиган жамоалар сирасига киради. 

"Бунёдкор" ҳам яхши шаклланган ёш жамоа. Менга уларнинг ҳақиқий футбол ўйнаши ёқади. "Оқ-тепа" ҳақида ҳам шундай фикр билдиришим мумкин. Таркибида бир қатор ёш ва тажрибали футболчилар бор. Ўз ўйинлари орқали мухлисларга ёқадиган футбол кўрсатишга ҳаракат қилишмоқда. Бизга қарши майдонга чиқадиган учта жамоа ҳам яхши ўйин намойиш этяпти", - дейди Жасур Абдураимов.