Жанубий Корея Кейрушга ўзи хоҳлаган маошни беришга тайёр

Куни кеча Кейрушнинг ўзига бошқа иш топгани, эндиликда у Жазоир миллий терма жамоасини бошқаришга тайёрлигини ёзгандик. Бугун эса бу мураббийга Жанубий Корея қизиқиш билдираётгани ҳақида хабар чиқди.

Эндиликда португалиялик мутахассис Жанубий Корея қизиқишлари доирасига тушиб қолган. Маълум бўлишича, Ж.Кореянинг "Hyundai" компанияси раҳбарининг ўғли Чунг Монг Гю мураббий хоҳлаётган маошни тўлаб беришга тайёр. Кейруш қайси жамоада ишламасин, йиллик маоши 3,5 миллион доллар бўлишини хоҳламоқда.

Чунг Монг Гю ҳозирда Жанубий Корея футбол ассоциацияси президенти ҳисобланади ва жуда катта маблағга эга инсонлардан бири. Унинг орзуларидан бири терма жамоага машҳур мураббийни олиб келиш. Хабарингиз бор, кореяликларни жаҳон чемпионатида Шин Таэ Ёнг бошқарди ва эндиликда ассоциация унинг ўрнига бошқа мураббийни қидирмоқда. Номзодлар орасида Кейрушдан ташқари Хуан Карлос Осорио билан Златко Далич ҳам бор. Лекин Чунг Монг Гю айнан Карлуш Кейруш келишини истаяпти.

Айтиб ўтганимиздек, Чунг Монг Гюнинг отаси Чунг Жу Юнг машҳур "Hyundai" компанияси раҳбари ҳисобланади ҳамда унинг бойлиги "Форбс" журнали томонидан бир миллиард доллардан зиёд баҳоланган.