Жамоасини ЕЧЛ гуруҳ босқичига олиб чиққан 5 азамат ФОТО

Унинг якунига кўра бешта жамоа ЕЧЛ гуруҳ босқичига йўл олган бўлса, мағлуб бўлган беш жамоа Европа лигасида иштирок этадиган бўлди.

Биз плей-офф ўйинларида ўзини кўрсатиб жамоасининг ғалабаларига хисса қўшган беш нафар футболчини танлаб олдик.


Хорватия чемпиони Загребнинг "Динамо" клуби плей-оффда Албания чемпиони "Скендербеу"га қарши ўйнади. Илк учрашувда сафарда ғолиб бўлган "Динамо"нинг кейинги босқичга чиқиш имконияти ошиб кетганди. Жавоб ўйинида Хорватия клуби 4:1 ҳисобида зафар қучди.

Жазоирлик Ал Арби Ҳилол Судани иккита ўйинда 3та гол урди. 27 ёшли ҳужумчи "Динамо"нинг икки йиллик танаффусдан сўнг яна ЕЧЛ гуруҳ босқичида ўйнашини таъминлади.

"ДИНАМО ЗАГРЕБ" (Хорватия) - "Скендербеу Корче" (Албания) 4:1 (биринчи ўйин 2:1)

Қаҳрамон - Ал Арби Ҳилол Судани

Швециянинг "Мальме" клуби плей-оффда Шотландия чемпиони "Селтик" қаршилигини енгишга эришди. Скандинавия клуби илк ўйинни Шотландияда ўтказиб 2:3 ҳисобида ютқазди. Ўша учрашувда "Мальме"нинг иккала голига Йо Инге Бергет муаллифлик қилганди. Кечаги жавоб баҳсида швецияликлар 2:0 ҳисобида зафар қучишди ва гуруҳ босқичига йўл олишди. Қаҳрамон сифатида айнан илк ўйинда иккита тўп киритган Йо Инге Бергетни танлашга қарор қилдик. Қизиғи ўтган мавсумни бу футболчи айнан "Селтик" сафида ўтказганди...


"МАЛЬМЕ" (Швеция) - "Селтик" (Шотландия) 2:0 (биринчи ўйин 2:3)

Қаҳрамон - Йо Инге Бергет

Исроилнинг "Маккаби" клуби плей-офф босқичида ўз юришини тўхтатишини кўпчилик тахмин қилганди. Сабаби рақиб Швейцариянинг "Базель" клуби эди. Бироқ илк ўйинни сафарда ўтказган Тель-Авив клуби 2:2 ҳисобида дуранг билан уйига қайтди. Ўз майдонида эса 1:1 ҳисобини қайд этиб 10 йиллик танаффусдан сўнг яна ЕЧЛ гуруҳ босқичида ўйнаш ҳуқуқини қўлга киритди.

Қизиғи ушбу ўйинларда "Маккаби"нинг учала голини ҳам жамоа сардори Эран Заҳави киритди. Ҳақли равишда айнан уни қаҳрамон сифатида тан олдик.

"МАККАБИ ТЕЛЬ-АВИВ" (Исроил) - "Базель" (Швейцария) 1:1 (биринчи ўйин 2:2)

Қаҳрамон - Эран Заҳави

Украинанинг "Шахтёр" клуби қийинчилик билан гуруҳ босқичига йўл олди. Сафардаги дастлабки ўйинда Марлоснинг ягона голи Мирча Луческу шогирдларига ғалаба келтирганди. Жавоб баҳсида 2:2 ҳисоби қайд этилди. Бу ўйинда ҳам июль ойида "Металлист"дан сотиб олинган Марлос битта гол урди ва жамоасининг гуруҳ босқичига йўл олишида катта хисса қўшди.

"ШАХТЁР" (Украина) - "Рапид" (Австрия) 2:2 (биринчи ўйин 1:0)

Қаҳрамон - Марлос

Франциянинг "Монако" клуби ўтган мавсум ЕЧЛ чорак финалига қадар етиб борган эди. Янги мавсумда эса бу жамоа Европа лигасида иштирок этади. Сабаби монегасклар плей-оффда Испаниянинг "Валенсия" клубига икки ўйин натижасига кўра имкониятни бой бериб қўйишди. Испанияда ўтган дастлабки ўйинда "кўршапалаклар" 3:1 ҳисобида зафар қучишганди. Кечаги жавоб баҳсида эса "Монако" 2:1 ҳисобида ғолиб бўлди. "Валенсия" гуруҳ босқичида иштирок этадиган Испаниянинг бешинчи жамоасига айланди. Биринчи ўйинда гол урган ва голли пас оширган Софьян Фегули иккинчи баҳсда ҳам фаол ўйнади.

"Монако" (Франция) - "ВАЛЕНСИЯ" (Испания) 2:1 (биринчи ўйин 1:3)

Қаҳрамон - Софьян Фегули

Нарзулла Сайдуллаев тайёрлади