"Интер" — сўнги дақиқалар қироли

"Интер" ва "Наполи" учрашуви голларга бой бўлмаган бўлсада, курашларга бой, жуда қизиқарли кечди десак муболаға бўлмайди. Биринчи дақиқадаёқ Икарди рақиб дарвозаси тўсинини пойлади

Бу А Серия ва  топ-5 тарихидаги энг тез урилгна гол бўларди, чунки тўп дарвозага ўйиннинг 3-сониясида етиб борди. Италия чемпионатининг ҳозирги рекорди "Пьяченци" аъзоси Паоло Пожига тегишли. 2001 йил ушбу футболчи "Фиорентина" дарвозасини 8-сониядаёқ ишғол қилганди.

Кутилмаган зарба билан старт олган ўйиннинг охирги дақиқалари ҳам ажойиб ўтди. Бир қарашда иложсиз вазиятларда дарвозабонлар жамоаси жонига оро кирди, яна бир вазиятда "Интер" дарвозасига кириб кетаётган тўпни ҳимоячи қайтаришга эришди, Кулибали ҳакамни "олқишлагани" учун арбитр унга эртароқ "дам бериб юборди", кейин эса Лаутаро Мартинес ғалаба тўпини киритди.

Сўнгги дақиқаларда гол уриш бу мавсум "Интер"нинг ўзига хос "фишка"сига айланди.

• 86-дақиқадан кейин "Интер" 9 та гол урди. Жамоа А Серия ва ЕЧЛ баҳсларида рақиблари дарвозасини 36 бор ишғол этган. Яъни "нерадзурри"лар голларининг  1/4 қисмини охирги дақиқаларда киритганлар.

• Ушбу 9 голнинг 6 таси ўйин натижасини ўзгартирган. Фақатгина Политанонинг "Кальяри"га, Жоао Марио ва Наинголланнинг "Женоа" дарвозасига урган голлари натижага таъсир қилмай, фақатгина таблодаги ҳисобни ўзгартирган.

• Агар 86-дақиқадан кейин урилган шу 9 гол бўлмаганида, "Интер" ЕЧЛ плей-офф босқичидан анча аввал умидини узган бўларди.

Ички чемпионатда ҳам ишлар ҳозиргидек, ишончли 3-ўрин бўлмасди. Ўша голларни олиб қўйсак жамоа автоматик равишда 30 очко билан 5-поғонага тушиб қолади. Ва аксинча "Лацио" (31 очко билан) учинчи, тўртинчи – "Сампдория" (30 очко, тўплар нисбатига кўра: +12) бўлар эди.

Яқин ўтмишда Англия томонларда Ферги-тайм деган ибора бўларди-а, ана сизга Спалетти-тайм!