"Интер" мураббийи Эрон терма жамоаси машғулотларида ёрдам бермоқда

Паулу исмли физиотерапевт бир вақтлар "Порту"да ишлаган, ҳозирда "Интер" клубида фаолият олиб боради. 

"Интер" ўзининг биринчи рақамли ҳужумчиси Лаутаро Мартинеснинг жароҳати ҳолатидан тўлиқ хабардор, шунингдек, Маркус Тюрамнинг сурункали жароҳатини ҳисобга олиб, олдиндаги муҳим ўйинларда ҳужумчилар тақчиллиги инқирозига йўл қўймаслик учун алоҳида чора кўришга қарор қилди. Шу муносабат билан, клуб Меҳди Таремининг аҳволини яқиндан кузатиб бориш ва уни "Интер"нинг муҳим ўйинларига тайёрлаш учун бевосита Теҳронга физиотерапевт жўнатган.

БААга қарши ўйиндан сўнг 10 кунлик дам олиш кераклигини маълум қилган Меҳди Тареми ҳозирда Ўзбекистонга қарши ўйинни ўтказиб юбориши мумкин бўлган вазиятга тушиб қолди. Ҳаттоки, Амир Ғалинои ҳам ўйиндан олдинги матбуот анжуманида бу ҳақда ноаниқ гапириб, футболчининг майдонга тушиш-тушмаслиги кечга яқин маълум бўлишини айтганди. Бошқа томондан, терма жамоа тиббиёт штаби ҳамон эронлик ҳужумчининг аҳволини баҳолашга ҳаракат қилмоқда.

Тареми терма жамоа йиғини чоғида унинг сон қисми жароҳати борлигини маълум қилди ва бу эски жароҳат унинг жорий мавсумдаги фаолиятига таъсир қилди. Ҳаттоки, бу муаммо унинг "Интер"даги ёмон ўйинларининг асосий сабабларидан бири эканини таъкидлади. Яқин ҳафталарда "Интер"ни Италия кубоги доирасида "Милан" ва Чемпионлар лигасида "Бавария"га қарши иккита муҳим ўйин кутиб турибди. Шу боисдан ҳам Тареми ФИФА кунларида жароҳатини оғирлаштирмаслик учун ҳар қачонгидан ҳам эҳтиёткор бўлишга мажбур.

Эрон терма жамоаси шифокорлари Паулуга Таремини даволашни ишониб топширган бўлиши мумкинлиги айтилмоқда. Албатта, бу ҳақда ҳозирча расмий хабар чиққани йўқ, лекин муҳим жиҳати шундаки, Таремининг шахсан ўзи "Интер" билан келишиб, физиотерапевтни Теҳронга олиб келган. Паулу кеча терма жамоа машғулотларида бўлиб, Таремининг ҳаракатларини диққат билан кузатиб борди.

Эслатиб ўтамиз, Эрон – Ўзбекистон ўртасидаги учрашув бугун Тошкент вақти билан соат 21:00да бошланади.