Инчеондан ёзамиз. 13-кун кундалиги. Футболчилар бор, футболчилар

Келинг аввал, кеча ёзиб ўтганимдек, “Пахтакор”ни мана шу ерда профессионаллиги билиниб қолинганини таъкидлаб ўтсам. Аслида бу профессионаллик эмас, шунчаки оддий иш. Аммо бошқа клубларимизни бундай йўл тутмаганлиги мении ажаблантирди.



Гап шундаки, терма жамоамиз делегацияси ортга қайтиш чипталари 3 октябрга олинган эди. Сабаби, ҳеч ким терма жамоамизни эрта ортга қайтишини кутмаган. Чипталар билан ЎФФнинг ўзи шуғулланган. Улар ўз мажбуриятларини бажариб бўлганлар. Футболчиларга топилса, 1 октябрь куни ортга қайтадилар, топилмаса яна икки кун кутадилар. Жуда  кўплаб спортчилар айнан шу кунларга ортга чипта олганликлари учун ЎФФ биронта чипта топа олмаяпти. Аксига олиб Қирғизистон ва Тожикистон делегацияси ҳам Инчеонга Тошкент  орқали учиб келишган. Хуллас одам кўп, рейс кам. Бунақа бўлиши аввалдан маълум эди. Энди мен ўзимнинг эркин фикримни билдирсам. Бунга “Пахтакор” томонидан қилинган иш сабаб бўлди. “Пахтакор” 3 октябрни кутиб ўтирмасдан, ўз футболчиларига Инчеон – Олма Ота – Тошкент йўналиши бўйлаб 7та чипта харид қилди, гап тамом - вассалом, иш пишди.  Шунга шунчами дейишга шошилманг. Энди қаранг! Мусобақа якунига етганидан кейин ташкилотчилар учун сиз энди ортиқчасиз. Сизга на майдон беради машғулот учун, на югуриш йўлакчасини. Истасангиз спорт шаҳарчасида яшайверинг, истасангиз кетинг. Ўйин 26 сентябрь куни бўлиб ўтди. 3 октябргача яна 7 кун бор. Учишга бир кун вақт кетди денг ва бир кун дам олиш учун вақт жами 9 кун. 9 кун футболчи машғулотсиз қолиб кетяпти. Осиё ўйинларида майдонга тушмаган футболчиларни эса мусобақада футболсиз ўтказган кунларини ҳисобласангиз, бир ойдан ошади. Бу, бу ёшдаги футболчи учун жуда катта минус. Наҳот шунга клублар жиддий қарамаса. “Локомотив”-ку майли, захирасида ўйинчиси кўп, бу ердагиларга эҳтиёж сезмаса. Лекин шундай деймизку, Фозил Мусаев билан Ислом Тўхтахўжаев “Локо” учун ортиқчалик қилмайди. “Бунёдкор”-чи? “Бунёдкор”га Сардор Рашидовнинг тезроқ етиб келиши керак эмасми? Ўзи шундоқ ҳам асосий рақибини қочириб юборган бўлса. Менимча “Насаф”га Элдор Суюнов керак. Майли ўйин амалиётини йўқотмади деймиз, лекин яна бир “НО”си бор! Спортчилардан бири олимпия шаҳарчасига  олтин, яна бир  кумуш медал олиб келаётган бир пайтда, бу уларга руҳий зарба бўлишини ўйлаб ҳам кўрмаганлар. Бу аниқ. “Қизилқум” Наврўз Алимовга тезроқ келишини айтаяпти, Наврўз нима велосипедга ўтириб йўлга чиқсинми? Ўзи олий лигада “тўртта”гина ўйин бўлса, мавсумда кучга кирган йигитлар, бу ерда кун санаш билан овора. Мана бу бизнинг Профессионал лигамизнинг профессинонал клублари. Ҳа, айтгандай, футболчиларни нима қилади улар, натижага уларсиз ҳам эришиляпти-ку. Олинг қуда, беринг қуда. Бир маслаҳатим бор, ПФЛ ходимларини аслида Инчеонга олиб келиб, комиссар қандай ишлаш кераклигини кўрсатишимиз керак эди.



Кечаги кунда менга алам қилгани Таиланднинг ½ финалга чиққани бўлди. Иорданияни 2:0 ҳисобида ютган Таиланд терма жамоаси энди Саудия Арабистонини 3:0 ҳисобида таслим қилган Ироққа қарши майдонга чиқади. Битта яхшилаб автобус қўйса, финал кутиб турибди. Бу ерда аввалдан башорат қилинганидек, Жанубий Корея ярим финалда. Уларнинг рақиби Шимолий Корея. Ўйинмисан, ўйин бўлса керак.



Тушликка яқин гандболчиларимиз 5-ўринга чиқиш учун ҳиндистонликларга қарши баҳс олиб бордилар. Қийинчиликсиз ғалаба қозонилди. Шундан кейин МОҚ вакиллари билан курашга кетдик, ҳеч бўлмаса бронза учун баҳсни кўрамиз деб. Аммо чучварани ҳом санабмиз.  Бизни доимий равишда ортда қолдириб келаётган Жанубий Кореяда аслида футбол эмас, бейсбол биринчи рақамли спорт тури эканлигига шаҳсан амин бўлдим. Курашга кетаверишда 5 км. йўл юрдикми ёки йўқ, финал ўйини бўлаётган стадион атрофида минглаб машиналар катта тирбандликни келтириб чиқарган эди. Манзилга етиб боришимиз учун, машинамизга қанот керак бўларди. Энг яқин бурилишдан боксга йўл олишни режаладик, яқин бурилиш ҳам 30 дақиқа вақтни олди. Бир амаллаб боксга етиб борганимизда Ҳасанбой Дўстматов учинчи раундини ўтказаётган эди. Улгурганимча расмга туширдим. Битта жанг ўтиб Достонбек Турдиев Саудия Арабистон вакили Ҳадоди Яҳёга қарши рингга чиқди. Аксига олиб жанг бор-йўғи бир раунддан сал ортиқ давом этди. Ҳамюртимиз иккинчи раунднинг илк дақиқасидаёқ рақибини техник нокаутга учратди. Ўзи бошиданоқ саудиялик боксчининг техникасини кўриб ҳайратлангандим. Қўл худди сузувчиларникига ўхшаб у ердан бу ерга бориб келади.



28 сентябрь. Жанубий Корея, Инчеон
Нодирхўжа Юлдашев.