Илҳом Мўминжонов: "Бубаня билан келишувга эришилди. Олдимизда Суперлигага чиқиш вазифаси турибди"

"Локомотив" U-21 жамоасига қарши кечган учрашувдан сўнг бекободликлар устози Илҳом Мўминжоновнинг фикрлари билан қизиқдик.

- Янгидан жамоа шакллантириш тайёргарлик жараёнига қийинчиликлар туғдирмаяптими?

- Тайёргарлигимиз давом этмоқда. Январь ойида жамоани қабул қилиб олдик, мақсадимиз Суперлигага чиқиш. Дастлабки назорат учрашувимизни ўтказдик, таркибдаги 70 фоиз футболчиларимиз кўрикда бўлиб турибди. Бу учрашувда уларнинг ҳаракатларини кўриб олдик. Таркибга яна тажрибали футболчиларни жалб қиламиз. Олдимизга қўйилган вазифа сари интиламиз. Февраль ойида яна 6 та назорат учрашувимиз бор. Шу ўйинлар орқали жамоани шакллантиришга ҳаракат қиламиз.

- Навбатдаги йиғинда яна қандай номларни учратишимиз мумкин?

- Номдор ўйинчилар ҳам кўрикда бўлиб турибди. Айримлари билан шартнома имзоланган. Легионерлардан Бубаня билан келишувга эришилган. Яна 4 нафар хорижлик футболчини кўриб чиқяпмиз. 

- 2021 йил "Нефтчи"ни Суперлигага олиб чиққансиз. Лекин у даврдаги билан бу йилдаги Про лигада фарқ бор. Айниқса жорий мавсумда жамоалар сони ошяпти ва Суперлига йўлланмаси ҳам кўп эмас...

- Бир неча йиллар олдин "Нефтчи"ни мураббийлар штабимиз билан Суперлигага олиб чиққанмиз. Ҳозир ҳам Про лига кучаймоқда, тўғри ўтган йили анча суст кўринди. Лекин 2026 йилги Про лига жиддийроқ бўлади. 2021 йил ҳам 4 та жамоа курашган. Энди эса 10 та жамоами ёки 12 тами йўлланма битта ва плей-офф бор. 

- 2007 йил "Қурувчи"да тўпурар бўлган йилингизни қандай эслайсиз?

- 20 та гол билан тўпурар бўлганман. Ҳаётимда 8 йил Суперлигада ўйнаган бўлсам, охирги мавсумимда тўпурарлик насиб қилган. Лекин шунгача 14-15 та гол билан мавсумни тугатардим, чунки кучли ҳужумчилар бор эди. У даврлар энди тарихда қолди. Буёғига мураббийликда олдинга интилишимиз керак. 

Абдулазиз Искандаров суҳбатлашди