Игорь Шквирин: "Учрашувнинг якуни мантиқсиз бўлди"

Ўйин ҳақида

"Ўйин ҳақида кўп гапирмоқчи эмасман. Тан олиш керак, биринчи бўлимда рақибга мағлуб бўлдик."Пахтакор"  катта устунлик қилди.. Ҳаттоки, тўп ўтказиб юборишимиз ҳам эҳтимоли бор эди, дея оламан. Иккинчи бўлимда майдон эгаларидан ўйин тизгинини ўз томонимизга оғдиришга ҳаракат қилдик. Яхши қарши ҳужумлар ташкил қилдик. Лекин баҳс мантиқсиз якунланди. Охирги дақиқада дарвозамиздан тўп олиб чиқдик. Бу - футбол. Йигитларни қўллаб - қувватлайман. Улар майдонгда хоҳиш ва иштиёқларини кўрсата олишди. Айримлари жароҳатдан сўнг майдонга қайтди. Шогирдларим "Пахтакор"га муносиб қаршилик кўрсата олиш билан бирга, асабийлаштиришга ҳаракат қилишди. Рақибга омад тилайман",- дейди Игорь Шквирин. 

- Мураббий сифатида анча йилдан сўнг  "Пахтакор" стадионига ташриф буюрдингиз. Бу борада қандай таассуротлар қолди?

- Мазкур клубда кўп йиллар давомида тўп тепганман. Лекин ҳаммаси тарихда қолди. "Пахтакор"ни ўз майдонида ҳамма ютишни истайди. Ортиқча ҳиссиётларга берилмасдан навбатдаги учрашувга тайёргарлик кўрамиз. Энди битта фронтда курашамиз.

- Ёзги трансферларда таркибга жалб этилган футболчилардан қониқяпсизми?

- Ёзги трансферлар вақтида табиийки таркибни кучайтиришга ҳаракат қилдик. Қаердадир биз истаган нарса бўлмади. Бироқ ҳозир бу ҳақида гапирмоқчи эмасман. 

-"Турон" Суперлигада мағлубиятсиз серияни давом эттириши учун кучи ва захира имкониятлари етадими?

- Захирамиз яхши, деб ўйлайман. Жамоага бош мураббийи бўлиб келганимда олдимга аниқ мақсад қўйилди. Ортда қолган учрашувларда янада кўпроқ очко ишлашимиз мумкин эди.  Қаердадир нимадир етишмади. Клубда ҳар бир инсон ўз ишини қилмоқда. Футболчилар мураббийлар штаби томонидан берилган вазифаларни бажармоқда. Олдинга интилишда давом этамиз.