Ҳусайн Норчаев: "Вазият қизил карточкага тортмас эди"

- Ўйин "Насаф" учун жуда яхши бошланди, иккинчи бўлимда нима бўлди?

- Иккинчи таймда эътиборни йўқотдик деб ўйлайман. "Ал Аҳли" кучли жамоа, таркибида маҳоратли футболчилар йиғилган. Хатоимизни тезда жазолашди.

- Қизил карточка бўйича нима дейсиз, бу асабданми?

- Вазият қизил карточкага тормас эди, чунки икки футболчи бир-бирига елка билан ўйнашди, буни майдондан кўрдик. Энди видео орқали такроран томоша қиламиз.

- Асосийси иккита гол урдингиз, бу тўпурарлар рўйхатида ўз аксини топади. Иккинчи голни Роналду услубида нишонладингиз, сабаби Криштиану Саудия Арабистонида ўйнаётгани учунми?

- Шунақа деса ҳам бўлади. Гол уриб, жамоамга фойдам текканидан хурсандман, чунки ҳужумчиман. Кейинги баҳсларда ғалаба қозонишга яхшироқ ҳаракат қиламиз. Бу баҳс биз учун дарс бўлади. Йигитларга қўшимча тажриба... "Ал Аҳли"га муносиб қаршилик кўрсатдик деб ўйлайман.

- "Насаф"га буёғига қийин бўлади. Чунки Суперлигада чемпионликни ҳимоя қилишга уринасиз ва ОФК Элит Чемпионлар лигасида муносиб қатнашишга ҳаракат қиласиз. Бу бир-бирига ҳалақит қилиш мумкинми?

- Йўқ, бу менимча салбий таъсир кўрсатмайди. Бундай кучли жамоаларга қарши ўйин ёқимли. Ҳар 4-5 кунда майдонга тушамиз, яхши тикланиб, ҳар бир баҳсга муносиб тайёргарлик кўришга ҳаракат қиламиз.