"Ҳоким кубоги-2022". Ярим финалда 8 та тўп ўтказиб юборган "Денов" вакиллари қандай фикрда?

Бекзод Азимов, "Денов" клуби раҳбари:

- Биз "Ҳоким кубоги" мусобақасига тажриба тўплаш ва таркибни кучайтириш учун селекция ишларини амалга ошириш мақсадида келганмиз. Албатта, бир қатор кучли жамоалар билан ўйин ўтказдик ва ярим финал босқичига қадар етиб келдик. Шунча жамоа ичида кучли тўртликка кириш бу катта натижа деб ҳисоблайман. Йигитларга бугунги ўйиндан кейин раҳмат айтдим, уларни тушкунликка тушмасликка чорладим. "Қўқон-1912" Суперлигада ўйнайдиган кучли жамоа. Бу ўйин бизга катта тажриба мактаби бўлди деб ўйлайман.

Санжар Аҳмедов, жамоа сардори:

- Жамоамиз ўтган мавсум якунида Биринчи лига йўлланмасини қўлга киритди. "Ҳоким кубоги" мусобақасига таркибга янги жалб этилган футболчиларни синовдан ўтказиш ва тажриба тўплаш мақсадида келганмиз. Мазкур мусобақада кучли жамоаларга қарши ўйин ўтказдик, таасуротларимиз ёмон эмас. 

Бугунги ўйинда бизда чарчоқ аломатлари сезилиб қолди. "Қўқон-1912" Суперлига жамоаси, таркибида кучли футболчилари бор. Тезкор гол ва дарвозамиз томон белгиланган 4 та пенальтилар ҳисобнинг шундай йирик кўринишга келиб қолишига сабаб бўлди деб ўйлайман. Ғалаба билан "Қўқон-1912" жамоасини табриклайман, келгусида омад ва зафарлар ёр бўлсин.

Шунингдек, клубимиз раҳбари Бекзод Азимовга жамоадошларим номидан миннатдорчилик билдирган бўлардим. У киши сафар ҳаражатларини ўзлари қоплаган холда бизни "Ҳоким кубоги" мусобақасига олиб келдилар. 

Туманимиз ҳокимлиги қўллаб-қувватлаши остида янги мавсумда Биринчи лигада муносиб иштирок этиб, Про-лигага чиқишни мақсад қилганмиз. Деновда футболсевар мухлислар жуда кўп, биз уларга катта футбол атмосферасини тақдим этмоқчимиз. Ҳозирда жамоамизда Жалил Кимсанов, Акмал Абдураҳмонов, Сарвар Холматов, Роббим Ҳасанов, Элдор Бойматов, Дилшод Баратов каби тажрибали футболчилар бор.

Эртага мусобақанинг 3-ўрини учун "Дўстлик" жамоасига қарши майдонга чиқамиз. Бу жамоа бизга "эски таниш" ҳисобланади. Сабаби уларга пулька ўйинларида мағлуб бўлгандик. Гуруҳ босқичида "Дўстлик"ни мағлуб этдик, худди шу тарзда эртага ҳам ғалаба қозониб 3-ўрин соҳиби бўлмоқчимиз.

Бекзод Толибов ёзиб олди