Ҳаким Фузайлов: "Суперлигага чиқиши мумкин бўлган 10та клубни санай оламан"

"Биринчи турда "Янгиер" билан ўйин жуда ҳам қийин бўлганди, бугун ҳам шундай бўлди, олдинга ўтиб айтишим мумкинки биринчи давра тўлиқ шундай ўтади. Сабаби лигадаги клублар кучи деярли тенг. Кўплаб клублар ўз олдига Суперлига йўлланмасини мақсад қилиб қўйишган ва таркибни кучайтириб олишган. "Динамо" таркиби 90 фоизга янгиланди. Ким ғалаба қозонишни хоҳласа ўйин бошидан охиригача майдонда тинмай меҳнат қилиши шарт.

- Михайло Удод нима учун захирада қолдирилди?
- Сабаби у яқиндагина Ўзбекистонга етиб келди. Кейин назорат учрашувида жароҳат олди. Ҳозирги пайтда юртимиз иқлимига мослашмоқда.

- Абдураҳмоновнинг ўрнини тўлдириш қийин бўлмадими?
- Сирож Мелиев, Тимур Ҳакимов ва Олег Марчук каби футболчилар бор. Абдураҳмонов Туркиядаги мусобақада иштирок этиб сафимизга қайтиб келади.

- Жамоадан кетган футболчиларнинг ўрни тўлдирилдими?
- 15 январь куни жамоага келгандим. Рўйхатдан ўтказилган 25 нафар футболчини кўриб турибсиз. Мана шу ўйинчилар билан давралар оралиғига қадар бирга ишлаймиз.

- Дарвозабоннинг ўйинига қандай баҳо берасиз?
- Фарҳод Раҳматов ҳали ёш дарвозабон. Шу боис ўз устида кўпроқ ишлаши керак.

- Кейинги ўйинда дарвозада ротация бўлса керак?
- Нафақат дарвозабон чизиғида, балки бошқа чизиқларда ҳам ротация қиламиз.

- Ўзбекистон Суперлигасида Эҳсони Паншанбе каби тожикистонлик футболчилар бор. Сиз ҳам Тожикистондансиз, "Динамо" сафида тожикистонлик футболчиларни кўришимиз мумкинми?
- Агар молиявий томонлама келиша олсак нима учун йўқ? Айни пайтда молиявий имкониятимиз легионер футболчи олишга етмаса керак. Агар келажакда олдимизга Суперлигага чиқиш вазифаси қўйилса балки кучли легионер олиб келармиз. Эҳсонига келсак у тажрибали ўйинчи, миллий терма жамоа аъзоси, қўл остимда терма жамоада ҳам, "Истиқлол"да ҳам ўйнаган.

- Суперлигага чиқиши мумкин бўлган 2та клуб номини тахмин қила оласизми?
- Мен 10та клубни санай оламан. Менимча барча клублар тенг имкониятга эгалар.