Ҳаким Фузайлов: "Агар ўрнимга бошқа мураббий топилса, ишдан бўшашга тайёрман"

- Ўйин ҳақида фикрингиз?

- Нима дейишим мумкин, "Насаф" чемпионатимиз пешқадами. Улар иккита фронтда ўйнаяпти, шунга қарамай бу жамоага қарши осон бўлмаслигини билардик. Бугун ҳаракат қилдик, аммо ютқазиб қўйдик. Олдинда ҳали 7та тур бор, кураш давом этади. Мағлубиятлар клуб раҳбарияти ва мухлисларимизнинг жонига тегиб кетган бўлиши мумкин. Тўғриси, ўзим ҳам бундан чарчадим. Агар ўрнимга бошқа мураббий топиладиган бўлса, ишдан бўшашга тайёрман. Жуда толиқдим.

- Бугун жамоангиз дуранг қайд этиши мумкин эди.

- Нафақат дуранг, балки ўз имкониятларимизни йўққа чиқармаганимизда ютиб кетишимиз ҳам мумкин эди. Чунки биринчи таймда ҳам, иккинчи бўлимда ҳам қулай вазиятларга эга бўлдик. Имкон бўлди дегунча кўп вазият яратяпмиз, лекин фойдаланишга келганда оқсоқлик бор. Шунинг учун яхши ўйнаяпмиз деган гаплардан чарчадим.

Мағлубият бу - мағлубият. Барибир ютқазсанг ишдан чарчайсан. Тўғри, жамоамиз яхши ўйин кўрсатяпти, лекин натижа бўлмаяпти. Жамоани чиройли ўйин эмас, қўлга киритилган очколар Суперлигада сақлаб қолади. Ўйлашимча, мухлисларимиз ҳам зиқ бўлиб кетишди. Ҳаммаси раҳбарият қўлида, қарорни улар чиқаради, менинг ўрнимга кимнидир олиб келишса шу заҳоти ишдан кетаман. Чунки жамоани Суперлигада олиб қолиш керак.

- "Хоразм" аксар голларни 75-80-дақиқалардан кейин ўтказиб юборяпти. Бу жамоанинг жисмоний ҳолати билан боғлиқми?

- Футболчиларимизнинг жисмоний ҳолати яхши. Биз ўйин бошидан охиригача бир хил ҳаракат қила оламиз. Фақат концентрация йўқолиб қоляпти, шунинг учун голлар ўтказиб юборяпмиз. Ҳаттоо ўйиннинг охирги дақиқаларида ҳам ҳужум қила оламиз, фақат якуний зарбани бера олмаяпмиз.