Ҳакамлар қайси клуб фойдасига ишлади? Қайси ҳакам энг кўп хатога йўл қўйди? Экспертимиздан мавсумнинг якуний хулосалари

Мавсум якунида эса барча хатолар сарҳисобини жамладик.

Ҳакамлар "Насаф" (11) ва "Локомотив" (12) фойдаси учун энг кўп хатога йўл қўйган. Шу билан бирга, қаршиликлар иштирокидаги ўйинларда рақиб жамоалар фойдасига 8 та, "темирйўлчилар" иштирокидаги баҳсларда эса қарама-қарши жамоа манфаати учун атиги 3 та хатога йўл қўйилган. Шу тариқа, "Локомотив" ҳакамлар хатоларидан энг катта наф кўрган жамоа бўлди (+9). "Насаф"да хатолар баланси +3 ни ташкил этади. Кейинги ўринларни ОКМК (7 та хато жамоа фойдасига, 1 та хато жамоа зарарига, умумий баланс +6) ва "Қизилқум" (9 та хато жамоа фойдасига, 2 та хато жамоа зарарига, баланс +7) эгаллаган.

Ҳакамлардан энг кўп жабрланган жамоа "Олимпик" бўлди - клуб зарарига 14 та хато қарор қабул қилинган. Аммо "олимпиячилар" фойдасига ҳам анчагина хатолар қилинганини тан олиш керак - 7 та. "Олимпик"нинг умумий баланси -7 ни ташкил этди. Иккинчи ўринда "Бунёдкор" жойлашган (3 та хато жамоа фойдасига, 9 та хато жамоа зарарига, баланс -6).

Ҳакамларга келсак, таҳлилларимиз натижаларига кўра, энг кўп хато Ғайрат Жўраевда қайд этилган - 12 та. Иккинчи ўринни ПФЛ томонидан Суперлигада мавсумнинг энг яхши ҳаками деб эътироф этилган Шавкат Насибуллаев (8 та) эгаллаган. Фирдавс Норсафаров ва Абдурашид Худойберганов ҳисобида 6 тадан хато мавжуд.