Ҳафта қаҳрамони - Бас Дост

Ушбу саҳифа орқали ўтган ҳафтанинг энг яхши футболчиси ҳақида қисқаса маълумот берилиб борилади.



Биринчи қаҳрамон сифатида Германиянинг "Вольфсбург" ҳужумчиси Бас Достни танладик. Ушбу ҳужумчи "бўрилар" сафида бундеслиганинг иккинчи даврасидан бошлаб асосий ҳужумчи сифатида ўйнай бошлади. Ивица Оличнинг жамоадан кетиши голландиялик "снайпер"га йўл очди десак муболаға бўлмайди. "Вольфсбург" бош мураббийи Дитер Хеккинг Олич жамоадан кетиши биланоқ Бас Достга асосий таркибдан жой ажратди. Бу имкониятни эса Дост кўкка совургани йўқ. Ушбу мавсумда Бас Дост "бўрилар" сафида 10 та беллашувда майдонга тушиб, рақиблар дарвозасига 9 маротаба йўл топди.



Аввалига бундеслиганинг иккинчи даврадаги илк ўйинида "Бавария" дарвозасини икки бор "ўққа" тутиб, жамоасининг муҳим ва йирик ғалабасига замин яратган эди. Кейинчалик "Хоффенхайм" билан бўлган ўйинда гол ва голли пасни ўз ҳисобига ёздириб қўйганди. Ўтган ҳафтада яна бир марказий беллашув "Байер"га қарши ўйинда Бас Дост фантастик ўйин намойиш этиб, Лено қўриқлайдиган дарвозага тўрт бор тўп йўллади ва жамоасига муҳим уч очкони тақдим этди. Ўтган ҳафтанинг энг яхши футболчиси бу "Байер" билан ўйинда покер қайд этган Бас Дост бўлди десак янглишмаймиз.



Бас Дост ҳақида қисқача маълумот:

Туғилган йили: 1989 йил, 31 май.
Фуқоролиги: Голландия
Бўйи: 192
Оғирлиги: 78 кг
Амплуа: Ҳужумчи
Клуби: "Вольфсбург"

Фаолияти:
1994-2001 "Германикюс" ёшлар жамоасида.
2001-2007 "Эммен" ёшлар клуби.

Профессионал фаолияти:
2007-2008 "Эммен" (Голландия) (23 ўйин, 6 гол)
2008-2010 "Хераклес" (Голландия) (61 ўйин, 17 гол)
2010-2012 "Херенвен" (Голландия) (66 ўйин, 45 гол)
2012-... "Вольфсбург" (Германия) (51 ўйин, 21 гол)

Шаҳбоз Беғамов тайёрлади.