Гейнрих 3та ўйинга дисквалификация қилинди

Қозоғистон чемпионатининг 22-турдан ўрин олган «Иртиш»га қарши ўйинда Александр Гейнрих 87-дақиқада учрашув тўхтаб турган пайтда Карлуш Фонсеканинг оёғига зарба бергани учун қизил карточка олган эди.

Қозоғистон ФФ регламентига кўра ўйин вақтида рақибга атайин зарба бериш 3та ўйинга дисквалификация жазосига тортилади.

Ушбу жазо туфайли ҳамюртимиз 20 сентябрга қадар майдонга туша олмайди. Ўша куни чемпионатнинг 26-тур ўйинлари бўлиб ўтади.

Эслатиб ўтамиз, Гейнрих Ўзбекистон терма жамоасига номзод футболчи ҳисобланади. Термамиз 3 ва 8 сентябрь кунлари ЖЧ-2018 саралаши доирасида Яман ва Филиппин термаларига қарши ўйин ўтказади.