Германия терма жамоасининг ЖЧ-2018даги муваффақиятсизлигига яна бир сабаб топилди

Маълумотларга кўра, немис жамоаси Россиядаги мундиалда иккига бўлиниб олган экан. Биринчисида келиб чиқиши бошқа мамлакатдан бўлган футболчилар Жером Боатенг, Месут Озил ва Илкай Гюндоган бўлган. Иккинчисида эса ҳақиқий немислар: Томас Мюллер, Матс Хуммельс ва бошқалар. Биринчи гуруҳдагилар нариги гуруҳни "картошка" деб аташган, бу кулгили номни турклар немисларга нисбатан ишлатади. Иккинчи гуруҳдагилар "чет элликлар"га "канаке" деб ном қўйишган. Немислар келиб чиқиши бошқа мамлакатдан бўлганларни "канаке" (ҳақоратли сўз) дейишади.

Мюллер жамоадошларининг ўзини тутиши, суҳбатлашиши ва ҳаёт тарзи устидан кулган. Германия терма жамоасининг чет эллик вакиллари рэп-мусиқа эшитишади, қимматбаҳо буюмлар ва спорт машиналарини ёқтиришади, немислар эса сокинроқ ҳаёт тарзини маъқул кўришади.

Иккала гуруҳ ҳам жамоа бош мураббийи Йоахим Лёв ҳаракатларидан норози бўлишган. "Чет элликлар"га Лерой Сане, немисларга эса Сандро Вагнер мундиалга бормагани ёқмаган.

Эслатиб ўтамиз, Германия терма жамоаси тарихда биринчи марта гуруҳ босқичини муваффақиятсиз якунлади.