Футзал. Шуҳрат Суярқулов: "Нафақат футзал, балки катта футболда ҳам ўзимни синаб кўрмоқчиман"

- Шуҳрат, бугунги учрашувда меҳмонлар сафида энг яхши ўйинчи деб топилганлигингиз билан табриклаймиз. Бугунги ўйин ҳақида фикрларингиз қандай? Кеча мағлубият, бугун эса худди шу жамоа устидан ғалаба.
- Биринчи навбатда  жамоамиз билан аҳил ҳаракат қилдик. Кечаги учрашувда ҳам ёмон ўйин кўрсатмагандик, жамоамиз таркиби ёш маҳаллий футболчилардан иборат бўлганлиги учун бир оз омад етишмай мағлуб бўлдик. Бугунги учрашувга келадиган бўлсак, бир ўзим тўртта гол уришимда бу жамоадошларимни қўллаб қувватлаганлиги сабаб бўлди. Футбол жамоавий ўйин, шу боис барчасини жамоавий ўйин ҳал қилади. Жиззахллик мухлислармих кечаги учрашувдан сўнг бизга қўнғироқ қилишиб қўллаб-қувватлашди, уларнинг ишончларини оқлаганлигимиз учун хурсандман, мини-футболни мухлислар учун ўйнаймиз.  

- Келажакда Шухрат Суярқулов Ўзбекистон миллий футзал терма жамоасида ўйнаш орзуси борми?
- Шу спортга кириб келганимдан буён энг катта орзуим, миллий терма жамоа сафида майдонга тушиш. Нафақат футзал, балки катта футболда ҳам ўзимни синаб кўрмоқчиман. Мақсадим ўзбек футболи учун керак бўлса жонимни бериб, дунё майдонларида ватанимиз шарафини муносиб ҳимоя қилишдан иборат, ўз устимда мунтазам ишлайман.  

- Машҳур футзалчилардан кимларга мухлислик қиласиз?
- Ўзбек футзалчиларидан Жавлон Аноров, Фарҳод Абдумавлоновларга мухлислик қиламан, улар кўрсатадиган ўйинларига жудаям қизиқаман,  бизга ҳам  шу футзалчилар  даражасига чиқиш насиб этсин. Европада асли  бразилиялик бўлган Россия терма жамоаси аъзоси Эдер Лиманинг ўйинлари менга жуда ёқади, ундан ўрганаман.
Бизга шароит яратиб бераётганликлари учун клубимиз раҳбариятига, қўллаб-қувватлаган мухлисларга раҳмат, биз улар учун ҳам ғалаба қозонишимиз керак деб ўйлайман.  

Бекзод Толибов ёзиб олди.