Футзал. Дилшод Ҳайдарқулов: "Ўзбекистон кубоги янги форматининг ижобий томонлари бор"

Янгича форматда ўтадиган кубок турнири мутахассисларда турлича фикрларни келтириб чиқармоқда. "Динамо" футзал жамоасининг бош мураббийи Дилшод Ҳайдарқулов бу борада фикрлари билан ўртоқлашди. 

"Кубок учрашувларининг ташкил қилиниши ажойиб бўлди дея оламан. Биринчи ўринда ўйинлар сони кўпайди. Жамоалар 4 гуруҳга бўлинган ҳолда бир-бири билан ўзаро 2 маротабадан ўйнашади. Бу "Динамо"га ўхшаган жамоалар учун айни муддао. Бундай формат кўплаб футзалчиларни текшириб олиш ва тажриба оширишга ёрдам беради. 

Ўйлантирадиган томони шуки, Олий лига сентябрь ойида бошланади. Ёш жамоалар гуруҳдан чиқа олмаса 4 ойга яқин дам олар экан. Умуман футзал федерациянинг қарорларини тўғри деб биламан. Футзал федерациянинг алоҳида ташкил қилинишини яхши бўлди, чунки бир пайтлар Жаҳонгир Мираброрович даврида футзал федерация алоҳида бўлиб яхши ривожланган эди. Бу футзални олдинга интилишида катта рол ўйнайди. 

Янги жамоалар кўпайгани яхши. Шахсан мен "Нефтчи", "Гулистон" жамоалари қайтганидан хурсандман. ЎзСҚБ профессионал фаолиятини бошлагани билан табриклайман.Чемпионатимизда кучли жамоалар кўпайса, бу терма жамоамизга фойда бўлади. Кубок ўйинларида барчага омад тилайман",- дейди Дилшод Ҳайдарқулов.