Футзал бўйича Тошкент вилояти ҳокими кубоги қайси жамоага насиб этди?

Февраль ойи давомида бўлиб ўтган қизиқарли ва кескин баҳсларга бой бўлган мусобақада жами 26 та жамоа ғолиблик учун кураш олиб борди.

Дастлаб, турнирнинг ҳудудий босқичлари вилоятнинг Олмалиқ, Нурафшон, Чирчиқ ва Янгийўл шаҳарларида ташкил этилди.

Уларда муваффақиятли қатнашган Паркент ТТБ, “Металлург” (Олмалиқ), “Аммофос-MAXAM” (Олмалиқ) ҳамда “Янгийўл” жамоалари ярим финал йўлланмаларини қўлга киритишди.

Ярим финалда қуйидаги жамоалар ўзаро куч синашишди:

Паркент ТТБ — “Аммофос-MAXAM” (Олмалиқ) – 9:4

“Металлург” (Олмалиқ) – “Янгийўл” – 5:2

Финал учрашувлари Ўзбекистон давлат жисмоний тарбия ва спорт университетининг спорт манежида бўлиб ўтди.

Дастлаб, учинчи ўрин учун кечган беллашувда “Янгийўл” жамоаси “Аммофос-MAXAM” (Олмалиқ)ни 8:4 ҳисобида мағлубиятга учратди.

Ҳал қилувчи ўйинда эса, Паркент ТТБ футзалчилари “Металлург” (Олмалиқ) жамоаси устидан 10:3 ҳисобида яққол устун келиб, биринчи ўринни эгаллашди ва Тошкент вилояти ҳокими Кубогини қўлга киритишди.

“Тошкент вилояти ҳокими Кубоги-2020” мусобақасининг номинациялари бўйича қуйидагилар ғолиб, деб топилди:

“Энг яхши дарвозабон” – Лазиз Хўжааҳматов (Паркент ТТБ);
“Энг яхши ҳимоячи” – Эркин Худоёров (“Металлург”);
“Энг яхши ҳужумчи” – Бекзод Тожибоев (“Аммофос-MAXAM”);
“Энг яхши ўйинчи” – Андрей Снетков (Янгийўл).

Ғолиб ва совриндорлар ташкилотчилар томонидан вилоят ҳокимлигининг қимматбаҳо совғалари билан тақдирланишди.