Флик "Реал" - "Атлетико" ўйинини биргаликда томоша қилишни таъқиқлади. "Барса" футболчиларига баҳсни ўз хоналарида кўришга рухсат берилди

Кеча "Реал" Чемпионлар Лигаси 1/8 финал дастлабки ўйинида "Атлетико"ни мағлуб этди - 2:1. Бугун "Барселона" турнирнинг ушбу босқичида "Бенфика"га қарши майдонга тушади.

"Блауграна» бош мураббийи Ханс-Дитер Флик "Эстадио да Луш" стадионидаги кечки машғулотлардан сўнг бутун жамоани меҳмонхона ошхонасида кечки овқатга тўплади ва "Реал" ҳамда "Атлетико" жамоалари ўртасидаги ўйинни биргаликда томоша қилиш имкониятини истисно қилди. Немис мутахассиси ушбу учрашувни барча хоҳловчиларга кўришга рухсат берди, аммо фақатгина ўз хонасида.

Қайд этилишича, Флик Хавидан фарқли равишда рақибларнинг ўйинларини биргаликда томоша қилиш каби ташаббусларни унчалик қўллаб-қувватламайди. Испан бундай вақт ўтказиш жамоадаги бирдамликни мустаҳкамлайди деб ҳисобларди, аммо "Барселона"нинг ҳозирги мураббийи футболчилар нима қилиш кераклигини билиш учун етарлича профессионал эканлигига ишончи комил.