Февзи Давлетов: “Бухоро”га қарши ўйин қийин бўлади"

Мавсумни кўтаринки кайфиятда ўтказаётган бу икки жамоа ўртасидаги учрашув муросасиз ҳамда қизиқарли кечиши кутилмоқда. Бекободликлар бу ўйинга Тошкент вилояти Чирчиқ шаҳридаги “Кимёгар” стадионида тайёргарлик кўришди.

Бўлғуси учрашув ҳақида тўхталар экан, жамоа катта мураббийи Февзи Давлетов ўйин “Металлург” учун қийин кечишини яширмади. “Жамшид Саидов ҳамда Тачмурод Агамуродовлар бошчилигида Бухорода жуда кучли жамоа шаклланди. Бу ишга ўтган йилги мавсумнинг иккинчи даврасидаёқ пойдевор қўйилганди. Қишки ўқув-машғулот жараёнида таркиб яна бир қатор тажрибали ўйинчилар билан тўлдирилди. Айни пайтда “Бухоро” совринли ўринлар учун курашаяпти, деб бемалол айтиш мумкин. Шу маънода биз учун ўйин осон бўлмайди. Аммо, “Металлург”да ҳам кўтаринки кайфият ҳукмронлик қиляпти. Қолаверса, сўнгги учрашувдаги муҳим ғалаба йигитларнинг ўзларига бўлган ишончларини янада оширди. Шундай экан, биз Бухорога ижобий натижа учун йўл олаяпмиз”, дейди “Металлург” устози.

"Металлург" матбуот хизмати