Феруз Фаҳриддинов: “Характер эвазига ғалаба қозондик”

Бугун “Пахтакор” ўзининг навбатдаги учрашувини “Бунёдкор”га қарши ўтказди. Қизиқарли кечган баҳсда “шерлар” 6:3 ҳисобида ғалаба қозониб, очколарини сонини 13 тага етказиб олишди. Тошкент дербисидан кейин “шерлар” етакчиси Феруз Фаҳриддинов билан суҳбатлашдик. Фаҳриддинов “Бунёдкор” дарвозасига икки маротаба тўп йўллашга муваффақ бўлди. 

- “Бунёдкор”га қарши ўйин ҳақида

- Рақибимиз жуда тажрибали рақиб ҳисобланади. Ўйин жуда қийин бўлди. Биринчи бўлимда кўп хатоларга йўл қўйдик. Ўз даражамизда ўйнай олмадик. Танаффусдан кейин кўпроқ ҳужум ташкил этишга катта эътибор қаратдик. Вазиятларимиздан эса муҳим голларни урган ҳолда ғалабага эришдик. Йигитлар характери туфайли ғалаба қозондик. 

- Ортда қолган иккита ўйин борасида

- “Нефтчи” ва “Бунёдкор”га қарши ҳар икки баҳс биз учун осон кечмади. Фарғоналикларга қарши баҳсда анча қийналдик. Чунки иккинчи турнинг биринчи ўйини бўлгани туфайли ўз даражамизда ўйнай олмадик. Хатолар кўп бўлди. Хайриятки, иккисида ҳам муҳим ғалабаларга эришган ҳолда очколаримиз сонини кўпайтириб олдик. 

- Мақсадлари тўғрисида

- Тўғриси, мен "мана шунча гол ураман" деб ўз олдимга мақсад қўймаганман. Асосийси, жамоамиз ғалаба қозониши муҳим аҳамиятга эга. Қайси бир футболчи гол уришидан қатъий назар “Пахтакор” вазифасини бажарса, хурсанд бўламан.