"Фенербахче" Туркия Суперкубогида ёшлар жамоаси билан қатнашади ва... майдонга 9 киши бўлиб тушмоқчи

Туркиянинг "Фенербахче" клуби президенти ўринбосари Эрол Билежик "Адана Демирспор"га қарши ўйин олдидан баёнот билан чиқди. Билежик жамоанинг 7 апрель куни Туркия Суперкубоги доирасида "Галатасарой"га қарши баҳсда иштирок этишини маълум қилди. Бироқ у беллашувда асосий жамоа эмас, балки "Фенербахче"нинг U19 жамоаси майдонга тушишини таъкидлади.

Футбол мусобақаси қоидаларига кўра, жамоа ўйинни майдонда камида 9 нафар ўйинчи билан бошлаши керак. Ўйин давомида камида 7 нафар футболчи иштирокида ўйин давом этиши мумкин. Агар жамоа таркибида 6 киши қолса, ўйин ҳакам томонидан тўхтатилади.

Клуб раҳбариятининг маълум қилишича, жамоа 90 дақиқа ўйин ўтказмоқчи эмас. Улар қоидаларга биноан 9 киши бўлиб майдонга тушмоқчи ҳамда 6 футболчи қолгунга қадар ҳаракат қилмоқчи.

Эслатиб ўтамиз, "Фенербахче" сафарда "Трабзонспор" устидан ғалаба қозонгач (3:2), мезбон жамоа мухлислари майдонга тушиб кетишди ва ғалабани майдон марказида нишонлаётган футболчиларга ташланишганди. Натижада, клуб Туркия чемпионатидан чиқиб кетиши ҳақида хабарлар пайдо бўлганди.