Файф-Конте. "Челси"да ишлаган барча италиялик мураббийлар

Биз "аристократлар" билан ишлаган барча италиялик мураббийлар ҳақида маълумот беришга қарор қилдик.

Жанлука Виалли (1998-2000 йиллар)
1998 йил февраль ойида Лондон клуби раҳбарияти голландиялик Руд Гуллитни истеъфога чиқарди. Унинг ўрнини 33 ёшли италиялик Жанлука Виалли эгаллади. У жамоада ўйновчи мураббий сифатида иш бошлаганди. Виалли қўл остида "аристократлар" ўша мавсумнинг ўзида Англия Лига кубоги, Европа Кубок эгалари кубоги ва УЕФА Суперкубогини қўлга киритишган. 2000 йилда Виалли "Челси" билан Англия кубогида зафар қучганди. Ўша йил сентябрь ойида мавсумни ёмон бошлагани учун раҳбарият мураббийни истеъфога чиқаришга қарор қилганди. У билан бирга жамоани Жанфранко Дзола, Дидье Дешам ва Дан Петреску каби футболчилар ҳам тарк этишди. Виалли мураббий бўлганида клуб 143та ўйин ўтказган шулардан 76тасида ғалаба қозонган ва 38тасида дуранг ўйнаганди.

Кладио Раньери (2000-2004 йиллар)
Айни пайтда "Лестер" билан АПЛ чемпионли сари дадил қадам ташлаётган Раньери "Челси"да ишлаганини ёши катта ўқувчиларимиз билишади. Айнан шу мураббий даврида жамоага Френк Лэмпард, Эммануэль Пети, Уильям Галлас, Жо Коул, Дамьян Дафф, Хуан Себастьян Верон, Эрнан Креспо, Клод Макалеле, Адриан Муту каби юлдузлар келганди. "Аристократлар" 4 йил давомида ушбу мураббий бошчилигидаги ҳеч қандай совринга эга чиқа олишмаганди. 2002 йилги Англия кубоги финалида "Арсенал"га имконият бой берилган. 2004 йилги ЕЧЛ ярим финалида Лондон клуби "Монако"га ютқазиб қўйганди. Раньери "Челси" постида 199та ўйин ўтказди. Шулардан 107тасида ғолиб чиқди ва 46тасида дуранг ўйнади. 2004 йил май ойида унинг "Челси"даги фаолияти якунига етди. Уни ўрнини Жозе Моуриньо эгаллади.

Карло Анчелотти (2009-2011 йиллар)
"Челси"да ишлаган учинчи италиялик мураббий бу Карло Анчелотти ҳисобланади. 2009 йил июнь ойида жамоани қабул қилиб олган мураббий август ойида Англия Суперкубоги учун баҳсда "Манчестер Юнайтед"ни мағлуб этиб илк совринга эга чиққанди. 2010 йил май ойида Анчелотти "Челси" билан Англия чемпиони совринига эга чиқади. Клуб 38та тур давомида рақиблари дарвозасига 103та гол уришга эришади. Ундан олдин 1963 йилда "Тоттенхэм" бир мавсумда 100тадан ортиқ гол урганди. Карло Анчелотти АПЛда чемпион бўлган илк италиялик мураббийга айланганди. Ўша йил 15 майида "аристократлар" "Уэмбли"да "Портсмут"ни мағлуб этиб Англия кубогини қўлга киритишди. Биринчи мавсумда жамоа ЕЧЛда 1/8 финалида "Интер"га, иккинчи мавсумда чорак финалда "Манчестер Юнайтед"га имконият бой бериб қўйилганди. 2011 йилги мавсумда АПЛда "Челси" МЮдан кейинги иккинчи ўринни банд этганди. 2011 йил 22 май санасида "Эвертон"дан учралган мағлубиятдан сўнг Анчелоттига чиқиш эшиклари кўрсатилди. Унга товон пули сифатида 6 миллион фунт стерлинг тўланган эди. Анчелотти бошчилигида жамоа жами 109та ўйин ўтказиб 67та ғалаба ва 20та дуранг қайд этди.

Роберто Ди Маттео (2012 март - 2012 ноябрь)
2012 йил март ойида италиялик Роберто Ди Маттео португалиялик Андре Виллаш Боашнинг ўрнига бош мураббий этиб тайинланди. Унга қадар Ди Маттео бош мураббий ёрдамчиси бўлиб ишлаб келаётган эди. У қисқа вақт ичида ишлаб "Челси" тарихига кира олди. Айнан ушбу мураббий бошчилигида Лондон клуби илк бор Европа чемпионлар лигаси ғолибига айланганди. Ярим финалда "Барселона", финалда "Бавария" таслим этилганди. Бундан ташқари 2012 йил "Челси" Англия кубогини ҳам ўзиники қилганди. Финалда "Ливерпуль" мағлуб этилганди. Ёзда раҳбарият унга 2 йиллик тўлақонли шартнома таклиф қилишган. 2012 йил кузида "Челси" ЕЧЛ гуруҳ босқичида "Ювентус" ва "Шахтёр"дан кейинги ўринни эгаллаб плей-оффга чиқа олмаганидан сўнг Лондон клуби Ди Маттеони истеъфога чиқаришга қарор қилганди. Ди Маттео "аристократлар"ни 42та учрашувда майдонга олиб тушган ва 24та ғалабага эришганди. 9 ўйинда дуранг қайд этилган ва 9та ўйинда имконият бой берилганди.

Антонио Конте (2016 йил июль ойидан бошлаб)
2004 йил футболчилик фаолиятини "Ювентус"да якунлаб 2006 йилдан мураббийлик билан шуғулланиб келаётган Конте 10 йил давомида катта ютуқларга эришга олди. "Ареззо", "Бари", "Аталанта", "Сиена" каби Италиянинг у қадар номдор бўлмаган клубларида ишлаган мураббий 2011 йил ёзида "Ювентус" "тепасига" келди. Унга қадар "Бари" билан B серияда чемпион, "Сиена" билан B серияда иккинчи ўринни эгаллаганди. Турин клубида эса кетма-кет уч бор Италия чемпиони бўлди. 2012 йил Италия кубоги финалига қадар етиб борди. 2012 ва 2013 йилларда Италия Суперкубогини қўлга киритди. Кетма-кет уч йил давомида Италия А сериясининг энг яхши мураббийи деб топилди. 2014 йил ёзида Италия терма жамоаси бош мураббийига айланди. У бошчилигида "Скуадра Адзурра" Европа чемпионати финал босқичига йўлланмани қўлга киритди. Франциядаги қитъа биринчилигидан сўнг Конте Лондонга йўл олади ва "Челси"даги фаолиятини расман бошлайди. Конте "Челси"да бешинчи италиялик бўлади. Унинг фаолияти қандай кечишини вақт кўрсатиб беради.

Нарзулла Сайдуллаев