Фахрийлар Кубоги. “Андижон” – “Қўқон” баҳси поёнига етмади

Ўтган ҳафта Қўқонда маҳаллий “Қўқон” фахрийлари билан куч синашган “Андижон” фахрийлар жамоаси турнир регламентига кўра, кеча ўз майдонида жавоб ўйинини ўтказиши лозим эди. Айтиш жоизки, ушбу жамоаларнинг дастлабки ўйинида 5:1 ҳисоби қайд этилганди. Шу боис андижонликларнинг кейинги босқичга чиқиши учун камида 4:0 ҳисобидаги ғалаба қониқтирарди. Ва бу билан улар Тошкентда ўтадиган ярим финал босқичига йўлланмани қўлга киритарди.
Шу боис мезбонлардан сермаҳсуллик талаб этиларди. “Қўқон” фахрийлар жамоаси эса табиийки ўз дарвозаси даҳлсизлигини сақлаб қолиш учун ҳаракат қиларди.

Олинган маълумотларга кўра, мазкур баҳс ўз поёнига етмаган. Сабаби қўқонликлар ҳисоб 3:0 кўринишда бўлиб турганида, норозилик билдириб, майдонни барвақт тарк этган. Учрашувдаги ҳакамлик “Қўқон” фахрийлар жамоасида эътирозларни келтириб чиқарган ва маълум вақт бу борада анчагина тортишувлар юзага келган. Айтиш лозимки, ўйинни андижонлик Акмал Раҳимов бошчилигидаги ҳакамлар гуруҳи бошқариб борган.

Championat.asia бунга жиддий қарайди ва ҳар икки томон вакиллари билан музокара ўтказган холда, вазиятга ойдинлик киритади. Воқеалар ривожини сайтимизда кузатиб боринг.