Фарруҳ Зокиров: "Ўйин финал каби ўтди ва Шойимованинг бенефисига айланди"

Голларга бой ўтган ўйинда вакилларимиз рақибларини 6:2 ҳисобида таслим қилди ва мусобақанинг финал босқичига йўлланмани қўлга киритди. Учрашувдан сўнг терма жамоамиз устози Фарруҳ Зокиров фикрлари билан ўртоқлашди. 

"Ўйин финал каби ўтди, чунки бизга ғалаба зарур эди. Қизларимиз буни тушуниб турган ҳолда ўйинга чиқишди. Кўрдингиз ўйин Шойимованинг бенефисига айланиб кетди. Улар ғалабани кўпроқ исташди. Филипиннинг мағлубияти бизни тўплар нисбатида катта фарқ билан ютишимизга ундади. Буни уддалаганимиздан хурсандмиз. Иккинчи ўрин билан Осиё кубогига йўлланма олдик. 

Туркманистонда ҳам имконият бор эди. Шу боис бор кучлари билан ўйнашлари аниқ эди. Вазиятлардан фойдалана олмаслик футболда ҳам бор. Бунинг устида доимий ишлаш керак. Аввалги учрашувларда мазкур омил панд берганди. Туркманистон билан вазиятлардан фойдаландик. 

Саралашдаги жамоаларимизни билганимизда Австралия, Филиппинни ўзимиз учун асосий рақиб сифатида белгилаб олган эдик. Улар билан ўйинлар қийин бўлди. Баъзи бир қизларимиз футболдан чиқиб футзалга киргани учун тайёргарликка вақтимиз бироз қисқа бўлди. Умумий олиб қараганда Осиё кубогигача вақт бор ва яхши тайёргарлик олиб боришга ҳаракат қиламиз",- дейди Фарруҳ Зокиров.