Фарҳод Соҳибжонов: “Бу ғалабани мухлисларимизга бағишлайман”

Ўйин тақдирини ҳал қилган гол муаллифи мезбонларнинг 20 ёшли футболчиси Фарҳод Соҳибжонов бўлди. Учрашувдан сўнг ягона гол муалифи бўлган Соҳибжонов билан суҳбатлашдик. 

- Фарҳод, сизнингча “Андижон” ниманинг эвазига “Пахтакор”ни мағлубиятга учратди?

- Мазкур учрашувга футболчилар билан жиддий тайёргарлик кўрдик. Рақиб кучли бўлса-да, охирги сонияларга қадар курашдик. Қилган меҳнатимизга яраша тақдирландик деб ўйлайман. Бу ғалаба осонликча қўлга киритилгани йўқ. Футболчиларнинг майдонда кўрсатган меҳнатлари самараси билан қўлга киритилди деб ўйлайман. Шу ўринда айтиш керакки, бугунги ғалабани мухлисларимизга бағишлайман.

- “Андижон” мавсум давомида бир текис ўйин кўрсата олмаётганига муносабатингиз қандай?

- Тўғриси, бу саволизга нима дейишга ҳам ҳайронман? Ҳар бир учрашувда йигитлар бор кучлари билан тўп тепмоқда. Вазиятлар яратмоқдамиз. Шунга қарамай, омадимиз келмаяпти. “Пахтакор”дек жамоани мағлубиятга учрата олганимиз, бизга катта куч тақдим қилади деб ўйлайман. Суперлигада қолиш учун жон-жахдимиз билан ҳаракат қиламиз. 

- Ўйин тақдирин ҳал қиладиган голни уришингизни кутганмидингиз?

- Йўқ албатта. Айнан менинг голим жамоамга ғалаба тақдим қилишини умуман кутмагандим. Жамоадошларим туфайли ушбу голни уришга муваффақ бўлдим. 

- Жамоангизни Суперлигада қолиш имкониятини қандай баҳолайсиз?

- Сўнгги турга қадар курашамиз. Вазифани бажариш ва мухлисларимизни хурсанд қилиш асосий мақсадимиз ҳисобланади. Умид қиламанки, биз олдимизга қўйилган мазкур вазифани тўлиқ бажара оламиз.