Евгений Жук: "Бугун, айнан бугун менинг она шаҳрим Киев 5 соат ўққа тутилди"

"Францияга қарши ўйин жуда қийин ўтди. Гарчи ҳисоб йирик бўлса-да, беллашув 4 ёки 5-голга қадар биз учун жуда қийин ўтди. Унга қадар натижани сақлаб қолишга ва вазиятлардан унумли фойдаланишга ҳаракат қилдик. 

Бу ғалаба биздан кўра мамлакат учун муҳимроқ. Биласизми, бугун, айнан бугун менинг она шаҳрим Киевда тревога эълон қилинди ва шаҳар 5 соат давомида ўққа тутилди. Кўп портлашлар бўлди. Бутун Украина ракеталар ва дронлар таҳдиди остида эди. Ва бу нафақат бугун, балки икки йилдан ортиқ вақтдан бери содир бўлмоқда. Яна бир бор таъкидлайман, мазкур ғалаба биздан кўра мамлакат учун муҳимроқ. Чунки биз ҳозир шундай вазиятдамизки, олдинги сафдаги жангчиларимизга ижобий ҳис-туйғулар керак бўлади.

Жаҳон чемпионати ҳақида таассуротларимни сўз билан ифодалай олмайман. Бу биз учун ақл бовар қилмайдиган жараён. Ўйлайманки, мундиалда нималар қилганимизни англагунимга қадар бироз вақт керак бўлади", деди бугунги ўйиндаги дубль муаллифи.

Эслатиб ўтамиз, Украина жаҳон чемпионатида бронза медалларини қўлга киритиб, ўз тарихидаги энг яхши натижасини қайд этди.

Оқил Абдубарноев суҳбатлашди.