"Эртага энг муҳими мухлислар ўйиндан зерикиб қолишмасин" — Артур Геворкян Ўзбекистон - Туркманистон учрашуви олдидан

Хусусан, мухлис ва мутахассислар ҳам ўзларининг турли фикрлари, муносабатларини билдиришяпти. Мазкур баҳс олдидан ўзбекистонлик айниқса "Насаф" мухлислари ёқимтойи, туркманистонлик Артур Геворкянга бир нечта саволлар билан юзландик. Унинг фикрлари қуйидагича бўлди. 

- Сўнгги маротаба "Ахал" жамоасида тўп тепдингиз. Кўпчиликни қизиқтираётган савол Артур Геворкян ҳозир қаерда? Футболдамисиз ёки фаолиятингизни бошқа соҳа билан боғладингизми?

- Аввало Ўзбекистондаги барчага алангалик саломимни йўллайман. Мен аллақачон футболда эмасман. Бизнес, оила, шахсий юмушлар билан шуғулланяпман. Оиламга вақт ажратмоқдаман. 

- "Шўртан", "Пахтакор", "Насаф", "Локомотив", "Қизилқум". Қайси жамоанинг натижалари кўпроқ эътиборингизда туради?

- Бирор жамоани ажратиб кўрсатмоқчи эмасман. Ҳар бир жамоада яхши йигитлар жамланган. Ўзининг ажойиб мухлисларига эга. Лекин мен "Насаф" билан кўп нарсага эришдим, ҳеч қаерда олмаган тажрибамни олдим. Бунинг учун барча мураббийлар ва ҳамкорларга раҳмат айтишни унутмаслигим керак. 

- "Насаф" ҳақида фикрингизни давом эттирсак. Чемпионлик учун жамоага нима етишмаяпти?

- "Насаф"ни тўхтатмай кузатиб бораман. Мураббийларнинг тизмли ишига шунчаки қойил қолиш керак. Уларнинг айримлари билан ҳамон мулоқот қилиб тураман. Бундай барқарорликни, клуб олдига қўйилган вазифаларни бажарилишини  ҳеч қачон кўрмаганман. Уларга бир кун барибир чемпионлик кубогини қўлга киритишларини тилайман. Худо хоҳласа клуб бу ишни уддасидан чиқади.  

- Драган Черан сиздан кейинги "Насаф" ва Ўзбекистоннинг энг яхши легионери бўлдими? 

- У жуда яхши ижрочи. Ҳар йили кўрсатадиган ўйинлари Ўзбекистондаги энг яхши ҳужумчилардан бири эканлигидан далолат беради. Омад тилайман. 

- Ўзбекистон - Туркманистон қарама-қаршилигидан қандай ўйин кутяпсиз?

- Энг муҳими стадионга келган мухлислар зерикиб қолишмасин. Жамоалар чиройли ва томошабоп футбол бўлсин. Албатта учрашувни томоша қиламан. Менга ҳам бу қизиқ.